Lit e Micse

La mairia de Lit e Micse

Lit e Micse
Lit-et-Mixe

Mairia de Lit e Micse

Geografia fisica

Coordenadas

44° 02′ 00″ N, 1° 15′ 20″ O

Superfícia

112,95 km²

Altituds
· Maximala
· Minimala

72 m
0 m

Geografia politica

França

Guy-Bertrand Puyo (UMP) (2008-2014)

Geografia umana

Populacion
Populacion totala
(2013)

1 563 ab.

ab.

Densitat

13,84 ab./km²

Autras informacions

Escais

La grana dauna deu Maransin

Gentilici

los Lités e los Micsés

Còde postal

40170

Còde INSEE

40157

Lit e Micse^[1] (en francés: Lit-et-Mixe) qu'ei ua comuna d'Occitània, en Gasconha, situada dens lo departament de las Lanas e la region d'Aquitània.
Lit e Micse qu'es chafrada "La grana dauna deu Maransin".

Geografia[modificar | modificar la font]

L'eglisa de St Vincenç de Micse

La comuna de Lit e Micse que’s tròba dens lo Maransin, a la termièra deu Bòrn. La Mar Grana qu’es a 9 km a sococ deu vilatge. Las comunas vesias que son : Sent Delian a bisa, Husar e Lo Binhac a só lhevant, Linça e Vièla-Sent Gironç au mijorn. La rota departamentau 652 aperada "rota deus lacs", que traversa lo vilatge deu nòrd au sud. La destota de l'estanh d'Usar que's vuita dens lo corrent de Contis, sus la "plana de Pijon". Tots dus que separan lo Bòrn deu Maransin. Dinc au sègle XIX, la plana de Pijon e los marescs qui bordejan uei lo corrent de Contis, qu'èran tot en aiga.

	Sent Delian
	N	Husar
	O Lit e Micse E
	S
Vièla e Sent Gironç	Linça	Lo Binhac

Gentilici[modificar | modificar la font]

Los abitants de Lit que son los Lités, e los de Micse que son los Micsés.

Istòria[modificar | modificar la font]

En 1826 la comuna de Lit e la comuna de Micse que son estadas arregropadas entà formar "Lit e Micse". En 1870 lo quartièr d'Usar que n'es estat destacat entà formar la comuna d'Usar, dab territòris pres a las comunas deu Binhac e Sent Delian.
Au primtemps de 1907, los gemèrs qu'arrefusan de tornar gahà's au hapchòt, pr'amor que vòlen iths tanbei, com los proprietaris deus pins, profieitar de l'aumentacion deu prètz de l'arrosia. Segon l'eslogan, que vòlen "La gema a mieja !". Pr'amor de quauques incidents, 200 òmis de tropa que son aperats, çò qui ne hèi pas qu'enveremiar las causas. Lo miador, Ernèst Ducamin qu'es empresoat pendent un mes. Lo 22 d'abriu, los gemèrs que tornan picar, shens aver obtienut arrei. Aqueths eveniments qu'an mercat dinc a uei los esperits dens tot lo Maransin e quitament lo pinhadar sancèr.

Economia[modificar | modificar la font]

Dinc a la plantacion sistematica de pins entà fixar las dunas e assecar los marescs, la comuna qu'èra cobèrta de dunas sus la mieitat oèst ; a l'èst qu'èran lanas paishudas per tropèths d'aulhas. Uei, lo pinhadar que capèra la comuna aus 85%. Lo bòi e la gèma qu'an hèit víver lo monde dinc a las annadas 1970.

Lòcs e monuments[modificar | modificar la font]

Jòns

Perduda dens las dunas, au mijorn, la hont de Jòns qu'auré quauques vertuts medicinaus. Au sègle XIX, l'endret qu'èra la sedença d'ua hèira deus fesilhs, dens la neit deu 7 au 8 de seteme. Las transaccions que's hasèn a l'escurada, e a la lutz deu matin, mantruns qu'èran susprés deu son ahar.
Uei enqüèra, la memòria d'aquera hèira qu'es güeitada per ua hèsta campèstra organizada peu quartièr de Micse.

Lo musèu "Lanas vielhas"

Lo musèu creat per lo "Club de l'Amistat" en 1987, que muisha mei de 2000 ostilhs e objèctes, balhats per la gent de las Lanas. Dens ua cosina, ua crampa, ua granja... personatges vestits dab la pelha deu dimunge o de trabalh, que nse tornan miar cent ans ad en arrèr. Projeccions videos que'ns muishan l'evolucion deu trabalh deus camps e deus pins : totas las òbras deus gemèrs que son estadas filmadas avant que n'agin completament dispareishut. La pesca a la pinassa e la caça que son tanbei evocadas.

L'eglisa de Nòsta Dauna de Lit

L'eglisa de Nòsta Dauna de Lit

Si la construccion de la tor carrada fortificada e data deu sègle XII, lo campanèr qu'es estat hauçat au sègle XIX, e dotat d'ua agulha hòrt particulara, en 1904. Dehens, que trobam quauques curiositats :

- Ua pietà de pèira policròma deu sègle XV^au.
- Sheis blasons escultats sus la pòrta de casso de l'eglisa (quate que son de la Maison de França : Carles VIII, Ana de Bretanha, Loís XII, l'escut deu Daufin ; un d'un avesque, e un aut, lhèu d'un senhor locau^[2]). Aquera pòrta deu sègle XV^au, qu'es classada Monument Istoric.
- Dus tablèus au hons de l'eglisa que son estats realizats arron 1920, peu pintre bordalés François Maurice Roganeau.

La pesca a la pinassa[modificar | modificar la font]

Aquera pesca a la pinassa tradicionau de la còsta aquitana qu'es enqüèra viva a la plaja deu Cap de l'Òmi, e tanbei a Contis. En partint de la còsta, la pinassa que desplega la traïna (hilat) en mar e que torna a tèrra arron avéisher descrivut un arc de cerc. Trajat peus dus caps, aqueth hilat qu'es halat suu sable.

Personalitats ligadas a la comuna[modificar | modificar la font]

Henri Crouzet (Lescura, Tarn, 1817 - Lit e Micse, 1880) : Engenhaire. Qu'estó un deus màgers mestieraus de las òbras d'assaniment de las Lanas de Gasconha.
Numa Turpin (Sent Delian, 1802 - Lit e Micse, 1873) : elejut Conselhèr Generau deu Canton de Castèths en 1834.