Termenés
Termenés es una encontrada que son nom deriva del castèl de Tèrme, que senhoregèt longtemps sul territòri. Termenés es situat dins la partida centrala de las Corbièras e administrativament dins lo departament d'Aude e la region d'Occitània, ancianament de Lengadòc-Rosselhon.
Termenés es una anciana vigariá de la diocèsi de Narbona que compreniá las vals nautas d'Orbiu e de Verdoble. Èra limitat al nòrd per la Val de Danha (diocèsi de Carcassona), al sud per Fenolhedés, a l'oèst per Rasés, a l'èst pel Narbonés pròpiament dit. Après la venda, consentida al capítol de Carcassona per Olivièr de Tèrme, de la senhoriá de la Val de Danha jol vassalatge del rei (1261), aquela partida de la diocèsi de Carcassona foguèt, per l'administracion de la justícia, annexada a la vigariá de Termenés. En 1317, la vigariá de Termenés foguèt unida a la de Fenolhedés[1].
Las fòrmas ancianas son : Termenes en 1067, Termenez en 1191, Terminesium en 1260, Terminecium en 1262, Termenesium en 1274 [1].
Lista de las comunautats de Termenés :
- localitats de la diocèsi temporala de Narbona : Aguilar, Albièras, Auriac, Boissa, Camlong, Camps, Carcassés, Castillon, La Cauneta, Clarmont, Coisa, Cubièra, Cucunhan, Davejan, Darnaculheta, Domnòva (comuna de Tuissan), Dulhac, Durfòrt, Las Ègas, Felinas de Termenés, Forcas, Lanet, Larièra, Maisons, Maçac o Massac, Maironas, Missegre, Montgalhard, Montjòi, Montrog, Molhet, Motomet, Novèlas, Padèrn, Palairac, Pasan, Pasiòls, Quentilhan, Ribauta, La Ròca de Fan, Rofiac de las Corbièras, Sant Laurenç (quin ? benlèu Sant Laurenç de la Cabrerissa), Sant Martin del Potz (nom supausat), Sant Pèire dels Camps, Salzan, Segura, Solatge, Talairan, Tèrme, Tesan, Tornissan, Treviac, Tuissan, Valmigièra, Vilaroja la Panosa, Vilaroja de Termenés, Vinhavièlha.
- localitats de la diocèsi de Carcassona (en Termenés dempuèi 1261) : Arquetas, Caunetas en Val, Domnòva (comuna de Montlaur), Favièrs, La Bastida en Val, Rius en Val, Serviès, Taurisa, Le Vilar en Val, Vilatritols [1].
Al sègle XVII, après la Reformacion de las Aigas e Forèsts e a aquel punt de vista administratiu (1671, Arch. Aude, C3, ff. 13 e 14), donèron lo nom de Termenés a un ensemble de territòris que compreniá la circonscripcion de la Vigariá e la Bassa Corbièra, çò es los cantons de Sijan e de Durban[1].
La vigariá de Termenés èra primièr de la jurisdiccion de la senescalciá de Carcassona; après 1642, ressortiguèt de la de Limós [1].
Del punt de vista espiritual, lo Termenés pròpiament dit formava, a la diocèsi de Narbona, un archipreirat que son caplòc èra Tèrme; compreniá 31 rectoriás, 4 vicariás perpetualas e 16 annèxas o capèlas. Fòra de l'archiprèire, archipresbyter Terminorum, l'arquevesque aviá un vicari general e un oficial per li ajudar dins l'administracion d'aquela partida de sa diocèsi : In Terminesio, vicarius archiepiscopi en 1278, Officialis Terminensii en 1317 [1].
Termenés es tanben un regropament faitís e administratiu modèrne de forèsts domanialas compresas dins las comunas de Massac (130 ectaras e 95 aras), de La Ròca de Fan (185 ha 89 a.), de Davejan (15 ha 20 a), de Maisons (184 ha 17 a), de Vilaroja de Termenés (200 ha 04 a.) e de Felinas de Termenés (45 ha 40 a.) [1] (al començament del sègle XX, benlèu après).
Non cal confondre Termenés e Termenet, sòrta de barbacana de l'ancian castèl feodal de Tèrme, Turrita munitio modica, sed fortissima, quae vulgo Terminetum dicebatur, al sègle XIII [1].
