Pòrt Sant Loís
 |
Vila d'Occitània |  |
|
Pòrt Sant Loís Port-Saint-Louis-du-Rhône | ||
|---|---|---|
 | ||
La Torre de Sant Loís | ||
| ||
| ||
| Geografia fisica | ||
| ||
| Coordenadas | 43° 23′ 15″ N, 4° 48′ 16″ E | |
| Superfícia | 73,38 km² | |
| Altituds · Maximala · Mejana · Minimala |
3 m 7 m 0 m | |
| Geografia politica | ||
| País | Provença | |
| Estat |  França | |
| Region 93 |
Provença Aups e Còsta d'Azur  | |
| Departament 13 |
Bocas de Ròse  | |
| Arrondiment 132 |
Arle | |
| Canton 1328 |
Pòrt Sant Loïs | |
| Intercom 241300177 |
Ouest Provence | |
| Cònsol | Martial Alvarez (2014-2020) | |
| Geografia umana | ||
| Populacion Populacion totala (2018) |
8 423 ab.  8 503 ab. | |
| Densitat | 116,72 ab./km² | |
| Autras informacions | ||
| Còde postal | 13230 | |
| Còde INSEE | 13078 | |
| http://www.portsaintlouis.fr | ||
Pòrt Sant Loís es una comuna provençala situada dins lei Bocas de Ròse. Situada a l'oèst dau golf de Fòs e au sud-èst de Camarga, es una vila industrialoportuària que fa partida de la zòna industriala de Fòs de Mar.
Geografia
[modificar | modificar lo còdi]
Pòrt Sant Loís se situa dins una zòna palunosa situada entre lo Grand Ròse a l'oèst e lo golf de Fòs a l'èst. Lo clima i es de mediterranèu amb d'estius eissuchs e cauds e d'ivèrns doç e mai umids. En causa de la posicion de la comuna dins l'aisse de la vau de Ròse, aqueu clima i es fòrça influenciat per lo mistrau. L'ensorelhament i es donc important, mai lei precipitacions son pus reduchas que dins lo rèsta dau departament (572 mm/an).
La vila istorica foguèt bastida sus la riba senèstra dau Grand Ròse. Es protegida per de restancas importantas car lo risc de vengudas deis aigas es non negligible. Lo còr de la vila se situa a l'entorn d'un pòrt interior ; un canau permet l'accès a la mar. Amb l'industrializacion de la region, la màger part dau litorau entre Pòrt Sant Loís e Fòs foguèt amainatjat per acuelhir d'installacions portuàrias. De linhas de camin de fèrre permèton d'unir aqueleis installacions e la ret ferroviària nacionala. La ret rotiera es mens desvolopada, mai una rota departamentala arriba a la vila a partir de la Rota Nacionala N568. Pòrt Sant Loís constituís ansin l'extremitat mai occidentala deis installacions portuàrias de Fòs-l'Averat, çò que se tradutz per una mena d'isolament.
La demografia de la vila es estable dempuei la fin deis ans 1980 amb de variacions compresas entre 8 500 e 9 000 abitants. Conoguèt un apogèu demografic dins lo corrent deis ans 1970 (10 393 abitants en 1975), mai la crisi industriala de la region de Fòs entraïnèt una baissa dau nombre d'abitants. Avans la creacion de la zòna industriala, Pòrt Sant Loís aviá conegut una creissença demografica relativament precòça gràcias a son ròtle portuari. L'economia actuala es totjorn principalament fondada sus leis activitats portuàrias. Pasmens, existís una activitat agricòla locala qu'assegura la produccion de ris e d'òli.
Istòria
[modificar | modificar lo còdi]
La vila de Pòrt Sant Loís es una creacion relativament recenta dins una region palunosa, mai estrategicament situada a l'embocadura de Ròse. Avans sa fondacion, una torre fortificada èra estada bastida dins la region en 1737 (la torre Sant Loís). Puei, durant lo Segond Empèri, de trabalhs d'amainatjament permetèron la construccion d'un canau per facilitar la navegacion entre Arle e Boc. Aquelei trabalhs permetèron la formacion d'un vilatge vertadier (300 abitants recensats en 1880). En 1881, la preséncia dau canau menèt a l'installacion de la Companhiá Generala de Navegacion. Aquò entraïnèt la construccion de cais, d'entrepaus e d'installacions portuàrias modèrnas. Lo vilatge conoguèt alora una creissença rapida e venguèt una parròquia autonòma. Puei, arribèt lo camin de fèrre en 1887 e la populacion contunièt d'aumentar amb 1 800 abitants recensats en 1892.
En 1904, una lèi fondèt la comuna de Pòrt Sant Loís a partir de territòris pres ai comunas d'Arle e de Fòs. La populacion èra d'aqueu temps compausada d'estrangiers (mai que mai d'Italians) e lei femnas i èran fòrça minoritàrias (25 % en 1904). L'equilibri demografic òme-femna se normalizèt après la Premiera Guèrra Mondiala e l'arribada d'emigrats grècs. En 1909, foguèt inaugurada la minotariá Gautier que poguèt aprofichar leis entrepaus per estocar lei cerealas necessàrias a son activitat. Puei, en 1930, la vila foguèt electrificada. D'aqueu temps, Pòrt Sant Loís èra vengut un pòrt fòrça modèrne de 4 200 abitants. A son apogèu, dins lo corrent deis ans 1930, èra lo segond pòrt marchand de França. Pasmens, durant la Segonda Guèrra Mondiala, leis Alemands destruguèron seis installacions avans d'abandonar la vila.
Après 1945, la populacion aumentèt rapidament per agantar 10 000 abitants dins lo corrent deis ans 1970. D'efiech, la creacion de la zòna industriala de Fòs entraïnèt un desvolopament generau dins la region marcat per l'installacion de populacions novèlas dins la region dau golf de Fòs e de l'estanh de Bèrra. Pasmens, Pòrt Sant Loís venguèt son importància regionala demenir en causa de l'aparicion de centres demografics mai importants coma Lo Martegue, Pòrt de Boc ò Fòs. De mai, en causa de son isolament relatiu, foguèt fòrça tocada per lei dificultats de la zòna industriala a partir deis ans 1970. Dins lo corrent deis ans 1980-1990, perdiguèt ansin mai de 15 % de sa populacion. Aquela crisi menèt a la fin de la dominacion dau PCF, localament au poder de 1965 a 1989, subre la comuna e s'acompanhèt d'una transformacion de l'economia locala per assaiar de desvolopar d'activitats toristicas en mai deis activitats portuàrias.
Cultura
[modificar | modificar lo còdi]Au nivèu culturau, Pòrt Sant Loís a repres lei tradicions culturalas de Camarga. Lei tradicions taurinas son ansin ben desvolopadas dins la vila amb d'arenas de 1 800 plaças. La pesca ocupa tanben una plaça importanta dins la cultura locala.
.svg){kind=small}