Romanés

Romanés

Limba română
Locutors	24 milions, 4 milions coma lenga segonda de
Tipologia	SVO [1] Sillabica
Familha lingüistica	Romanés
Estatut oficial
Oficial de	Romania, Moldàvia, Voivodina.
Acadèmia	Academia Română
Còdis de lenga
Glottolog	roma1327

Lo romanés (autonim: limba română) es una lenga romanica parlada per 26 milions de personas dins lo mond. La màger part, unes 20 milions, se concentran en Romania e mai de 2 milions e mièg en Moldàvia, encara qu'ailà la lenga se nomena sovent "moldau". Lo romanés a 77% de semblança amb l'italian.

Oficialament s'escriu amb l'alfabet latin, tant en Moldàvia coma en Romania. Mas durant l'ocupacion sovietica de Moldàvia, fins en 1989, lo poder sovietic i impausèt l'alfabet cirillic e pretendèt que lo "moldau" èra una lenga distinta del romanés. Los lingüistas estiman qu'aquel secessionisme lingüistic a pas cap de validitat scientifica. Uèi lo poder autoproclamat de Transnístria torna impausar l'alfabet cirillic al romanés, que lo nomena "moldau" e que pretend de nòu que seriá una lenga distinta del romanés .

A causa de son isolament geografic envèrs las autras lengas romanicas (se tròba enrodat de lengas eslavas, de lengas finoogricas e de lengas turquesas), lo romanés es una de las lengas romanicas mai desconegudas e diferentas dintre lo grop de las lengas romanicas, amb d'influéncias eslavas, del turc e de l'ongrés. Pasmens es una lenga fòrça establa e conservatritz del punt de vista evolutiu, que ten d'unas traças del latin qu'existisson pas pus dins las autras lengas romanicas.

Qualques caracteristicas lingüisticas

Mapa del romanés

Los noms e adjectius romaneses an tres genres (masculin, femenin e nèutre) e una flexion de cas. Los articles definits son enclitics envèrs lo nom (s'empegan après lo nom en formant amb el un sol blòc, coma los pronoms atòns e lo vèrb en italian e espanhòl), caracteristica unica demest las lengas romanicas. La conjugason verbala es pus complèxa que la de certanas autras lengas romanicas, amb a mai cinc mòdes diferents e una ampla varietat de formas impersonalas.

Es l'unica lenga romanica qu'a lo fonèma /h/, amb l'occitan gascon e qualques varietats de castelhan. L'ortografia es fòrça simpla. En çò que concernís lo lexic, 75% es d'origina latina, entre 10% e 20% es eslau e la rèsta ven d'autras lengas (dont 20% del francés), entre las qualas sobretot lo turc, l'italian e las rèstas del traci o del daci.

Estatut

Romania

Lo romanés es la sola lenga oficiala de Romania al nivèl nacional. Totun, las lengas minoritàrias son reconegudas dins las regions que mai de 20% de la populacion las parlan.

Moldavia

Lo romanés (sonat de còps moldau) es la sola lenga oficiala al nivèl nacional dempuèi l'independéncia de 1991. Es localement oficial amb lo gagauz, l'ucraïnian e lo rus, respectivament en Gagauzia e en Transnistria.

Autres païses

Lo romanés es tanben reconegut en Voivodina. Es oficial dins las municipalitats seguentas: Alibunar, Biserica Albă (Sèrbe: Bela Crkva), Zitiște (Žitište), Zrenianin (Zrenjanin), Kovăcița (Kovačica), Cuvin (Kovin), Plandiște (Plandište) and Sečanj. Dins la municipalitat de Vârșeț (Vršac), lo romanés es oficial solament dins los vilatges de Voivodinț (Vojvodinci), Marcovăț (Markovac), Straja (Straža), Jamu Mic (Mali Žam), Srediștea Mică (Malo Središte), Mesici (Mesić), Jablanka, Sălcița (Salčica), Râtișor (Ritiševo), Oreșaț (Orašac) e Coștei (Kuštilj). Lo sèrbe es tanben oficial dins aquestas municipalitats e a escala regionala es la lenga dominanta.

En Ucraïnia la lei de 2012 subre las minoritats li balha un estatut dins lo Raion de Hertsa e dins qualques vilatges de l'Oblast de Chernivtsi e l'Oblast de Zakarpattia

Lo romanés es ensenhat dins 25 païses coma lenga estrangièira. En Occitània, es ensenhat a l'universitat d'Ais de Provença.

Demografia

Romania

Segon lo recensament de 2011,se 88,9% de la populacion es compausada de romaneses, 90,6% de la populacion a declarat lo romanés coma lenga mairala. Al mens 98% de la populacion pòt parlar romanés ( 8% dels abitants de Romania, siá 1 600 000 personas) an lo romanés coma lenga segonda.

Moldàvia

Se Moldàvia a impausat lo romanés coma sola lenga nacionala, se vei clarament que la politica de russificacion de l'URSS es luènh d'èsser escafada. I a mens de personas que parlan romanés (2 543 354) que de Romaneses (2 638 125) siá un coeficient de continuitat lingüistica de 0,96.

Pel rus, se i a 201 218 Russes, i a 540 990 russofòns siá un coeficient de continuitat lingüistica de 2,69. Aquesta influéncia del rus se vei tanben demest las minoritats. Los Ucraïnians parlan mai rus qu'ucraïnian e un tèrç dels Gagauzes parla rus.

Totun, la normalizacion lingüistica se perseguís amb de resultats positius (lo romanés es mai e mai utilizat dins las administracions).

Cal notar tanben la dificultat pels Moldaus de se definir entre Romaneses e Moldaus. Se, etnicament, se definisson coma Moldaus, 20% dison parlar romanés. Aquesta situacion revèrta la del catalan e del valencian.

Etnia \ Lenga principala	Moldau	Romanés	Rus	Ucraïnian	Gagauz	Bulgar	Autras	cap de declaracion	Total
Moldaus	1,949,318	475,126	128,372	9,170	799	1,113	951	-	2,564,849
Romaneses	1,597	69,936	1,537	81	5	4	116	-	73,276
Russes	8,852	2,805	187,526	1,224	329	344	138	–	201,218
Ucraïnians	17,491	4,158	141,206	118,699	427	294	131	–	282,406
Gagauzes	2,756	609	40,445	413	102,395	821	61	–	147,500
Bulgars	4,652	1,046	23,259	188	673	35,808	36	–	65,662
autres grops	3,828	1,133	18,610	339	262	181	9,856	192	34,401
cap de declaracion	46	1	35	–	–	–	29	13,909	14,020
Total	1,988,540 58.77%	554,814 16.4%	540,990 15.99%	130,114 3.85%	104,890 3.10%	38,565 1.14%	11,318 0.34%	14,101 0.41%	3,383,332 100%

Ligams extèrns

• Lexic occitan lemosin - romanés