Anaram Au Patac

Un article de Wikipèdia, l'enciclopèdia liura.
Sauter à la navigation Sauter à la recherche
Cortègi d'AAP a la manifestacion de Besièrs.

Anaram Au Patac (AAP) qu’ei un movement politic occitan d’esquèrra revolucionària. Qu'ei favorable a l'independéncia deu pòble occitan dab un projècte de societat autogestionària tà Occitània. Lo son anar dab l’identitat occitana, la tèrra occitana, qu’ei basat sus la volontat de bastir Occitània dab totas e tots los qui i viven, d’on que sian. E aquò dens ua logica de justícia sociau, de solidaritat, de partatge de las riquessas, d’internacionalisme, mes tanben dens lo benestar de la lenga e de la cultura occitanas. Ne cred pas dens la superioritat de l'identitat occitana sus la de qui que sia, mes ne cred pas tanpòc que cau escóner-la o deishar-la morir.

AAP qu’ei a la crotzada enter Occitània e revolucion sociau. Qu’arrefusa l’idèa d’ua França ua e indivisibla, centralizaira, com un modèl politic definitiu, de la medisha faiçon qu’arrefusa l’idèa que lo capitalisme sia l’unic modèl economic qui sia possible. Qu'estima qu’autas vias tà organizà’s, tan politicas com economicas, que son possiblas e necessàrias.

Un element essenciau de la soa amira qu’ei de voler botar en plaça estructuras de lutas e de proposicions popularas hòrtas. AAP que prepausa d'estar sus aqueth camin: en miar accions revendicativas de cap a çò qui identifica com las agressions fascistas, capitalistas, imperialistas mes tanben en participar a la mesa en plaça d’alternativas.

AAP que’s caracteriza per un arrefús d’alinhament ideologic a ua pensada unica qui sia marxista, comunista, ecologista o libertària. AAP que vòu prepausar un equilibri revolucionari e occitanista enter los militants.

Implantacion geografica[modificar | modificar la font]

Lo nuclèu geografic e istoric d'AAP qu'ei Bearn. Totun que i a seccions e daubuns aderents en dehòra de Bearn, dens autes parçans d'Occitània, a Bordèu, Tolosa e Clarmont.

Lo sèti d'AAP qu'ei a Pau, dens lo petit monument istoric de la Tor deu Borrèu, qui estó au començament un locau per divèrsas associacions alternativas abans d'estar lo d'AAP solament.


Istoric[modificar | modificar la font]

AAP que vadó en 1992 dab l'encontre de militants politics bearnés qui vienèvan d'orizonts divèrs: de l'occitanisme tradicionau, de la mobilizacion ecologista contra lo tunèl deu Sompòrt dens la Vath d'Aspa, deus grops de sostien au movement basco, deu sindicalisme, etc. Los fondadors que causín lo nom d'Anaram Au Patac en reprene ua metafòra deu lengatge deu rugbi. Pro d'òra AAP que se n'i dé d'ocupar ua bona part deu terren politic de l'esquèrra revolucionària en Bearn en bèth profeità'i de l'abséncia o de la feblessa de las organizacions francesas abituaus d'extrèma esquèrra.

En 1995, AAP qu'estó un grop cofondator deu Corrent Revolucionari Occitan (CRÒC) en federà's dab dus autes grops, los Patriòtas Occitans (de Tolosa) e Occitània Libertat (d'Ais de Provença). La revista d'AAP, Har, fondada en 1995, que vadó lèu la revista deu CRÒC dab lo nom mei panoccitan Har/Far, mes la redaccion e la gestion que demorè au sèti d'AAP a Pau. Lo CRÒC que conegó un certan dinamisme entre 1995 e 2000 aperaquí. Mes la manca de coordinacion deu CRÒC, a l'escala panoccitana, que provoquè la soa dislocacion au començament deus ans 2000 e alavetz AAP que decidí de sortir deu CRÒC en 2001 e lo CRÒC que desparegó lèu.

Uei lo dia, AAP que contunha la soa existéncia de movement politic dab un domeni d'accion qui concerneish subertot Bearn.


Criticas hèitas a Anaram Au Patac[modificar | modificar la font]

AAP qu'ei criticat per ua gran part deu movement occitanista per'mor de non pas s'estar sabut, o volut, desmarcar de la luta violenta d'ETA. Totun, qu'ei sovent percebut, dens l'esquèrra paulina "tradicionau" (subertot lo PCF) com un movement violent. S'aqueth acús ei utilizat com argument per l'esquèrra tradicionau entà isolar AAP de la rèsta de las organizacions progressistas reivindicativas, d'un aute costat que cau díser que los d'AAP n'an pas jamei volut explicar miélher la soa desmarcha. D'aulhors, en s'encaborrint a non pas cambiar lo nom mei qu'ambigú de l'organizacion, e per tant que s'i hascan a explicar pudicament que s'ageish d'ua "metafòra rugbistica", que dan còca a las criticas qui'us son hèitas sus aqueth cantèr.

Tà dauvuns, AAP qu'ei tanben l'organizacion politica de las escadenças mancadas e de la manca estrategica: per exemple, ne's sap pas enqüèra, au cap de quinze ans d'existéncia, se AAP e luta per l'autonomia d'Occitania o per la soa independéncia.

N'ei pas estonable, dens aquestas condicions, que se AAP a atraçat monde de diferentas originas, que sian hèras tanben los qui an quitat ua organizacion qui estimavan incapabla d'evoluir.

Vejatz tanben[modificar | modificar la font]

Ligams extèrnes[modificar | modificar la font]