Val de Danha (territòri)
La Val de Danha (la Val de Daigne o la Val de Dagne en francés) es un territòri lengadocian geografic e istoric situat dins lo departament d'Aude e la region d'Occitània, ancianament de Lengadòc-Rosselhon.
Geografia[modificar | Modificar lo còdi]
La Val de Danha es una depression complèxa, o l'ensemble de doás depressions, una al sud-oèst e l'autra al nòrd-èst, traversada mai que mai per l'Alson (del Vilar), afluent d'Orbiu, e divèrses rius. Es al sud de la Montanha de Laric. L'Alson travèrsa la depression meridionala. Las doás depressions son religadas per un passatge situat entre la còsta de Domnòva e le Matassan, aprofieitat per la RD 3.
-
Extremitat sud de la depression meridionala (Caunetas en Val) -
Serviáns, dins la depression del sud-oèst. -
Arquetas, dins la depression del sud-oèst. -
Le Vilar en Val, a l'extremitat occidentala de la depression del sud-oèst. -
Pradèlas en Val, dins la depression del nòrd-èst. -
Montlaur, dins la depression del nòrd-èst.
.jpg)
Toponimia[modificar | Modificar lo còdi]
Las fòrmas ancianas son : Vallis Aquitanica en 820, Vallis Aquitanie en 870, Vallis Equitania en 951, Vallis Equitanicha en 956, Vallis de Dania en 1261, Vallis Daniae en 1269, Bajulus Vallis Daniae pro Rege en 1299, Laval de Dania en 1340-41, La Vau de Danie (en francés) en 1388, Vallis Danye en 1544 [1].
Danha es l'eretièr de Aquitània (encara que non se sàpia res de la valor fonetica d'aquel mot als sègles IX e X), non pas de Aquitanica. La Val jamai non foguèt de la província d'Aquitània dins sa primièra composicion, identica a la Novempopulània, nimai de las províncias d'Aquitània Primièra e d'Aquitània Segonda.
Le nom de Val a agut una certana popularitat administrativa, puèi que servís de determinant a de comunas que non son dins la depression, coma Fajac en Val. Existís dempuèi 2019 una comuna novèla del nom de Val de Danha, que correspond a la majoritat de la depression del nòrd-èst.
Istòria[modificar | Modificar lo còdi]
La Val de Danha èra una partida del Pagus Carcassonensis que compreniá las localitats : Caunetas, Rius, Taurisa, Serviáns, Vilatritols, Arquetas, La Bastida, Le Vilar en Val e les castèls de Trebes (primitivament Terbe o Tèrbe) e de Favièrs. Al sègle XIII, un baile reial èra al cap del territòri. Al sègle XIV, la Val de Danha èra unida a la vigariá de Fenolhedés e de Termenés. Ressortissiá a la senescalciá de Carcassona, puèi a la de Limós [1].
La nocion geografica de Val de Danha es pus ampla que la nocion istorica, que concernís sonque las comunas situadas dins la depression del sud-oèst.
Véser tanben[modificar | Modificar lo còdi]
Nòtas[modificar | Modificar lo còdi]
- ↑ 1,0 et 1,1 Abbé Sabarthès, Dictionnaire topographique du département de l'Aude, 1912, p. 458, legir en linha https://gallica.bnf.fr/ark:/12148/bpt6k110095d/f550.item.texteImage
