Lev Yashin

Un article de Wikipèdia, l'enciclopèdia liura.
Salta a la navegació Salta a la cerca
Fotografia de Lev Yashin en 1965.

Lev Yashin (22 d'octòbre de 1929, Moscòu - 21 de març de 1990, Moscòu) es un jogaire internacionau de fotbòl sovietic que jogava coma portièr. Es considerat coma lo melhor portièr de l'istòria dau fotbòl en causa de seis apòrts tecnics e tactics au pòste.

Nascut dins una familha d'obriers de la banlèga de Moscòu, descurbiguèt lo fotbòl en 1945 amb l'equipa de l'usina de son paire. Venguèt rapidament portièr e foguèt remarcat per Arkady Chernyshev, l'entrainaire de l'equipa d'oquei sus glaça dau Dinamo Moscòu, un important club omnispòrts de la capitala sovietica. Venguèt un jogaire de l'equipa premiera en 1950 e lo portièr titulari en 1953. Lo demorèt durant tot lo rèsta de sa carriera que s'acabèt en 1970. I ganhèt cinc còps lo campionat[1] e tres còps la copa d'URSS[2][3]. D'un biais pus anecdotic, ganhèt tanben una copa d'URSS d'oquei sus glaça[4].

A partir de 1954, Yashin venguèt lo portièr de l'equipa nacionala e foguèt selecionnat 78 còps. I ganhèt lo torneg olimpic de 1956 e lo campionat d'Euròpa en 1960. Se distinguiguèt durant lei doas competicions gràcias a d'intervencions decisivas, especialament durant la finala de 1960. Agantèt tornarmai la finala de la competicion en 1964 mai l'URSS i foguèt batuda per Espanha. En parallèl, Yashin participèt a plusors copas dau mond. Agantèt lei quarts de finala en 1958 e 1962 e lei semifinalas en 1966.

Arrestèt sa carriera professionala e preferiguèt laissar sa plaça a la copa dau mond 1970 a un portièr pus jove. Venguèt un responsable de la Federacion d'URSS de Fotbòl. Victima de problemas de santat a partir de 1986, moriguèt en 1990 en causa d'un cancèr de l'estomac.

Lev Yashin aviá de reflèxs e una soplesa extraordinaris que li permetián de realizar de paradas fòrça malaisadas. Per exemple, durant l'ensemble de la carriera, auriá arrestat 150 penaltys e acabat 270 partidas sensa encaissar un but. Pasmens, es desenant subretot famós per l'introduccion de plusors innovacions majoras dins lo ròtle de portièr tant au nivèu defensiu qu'ofensiu. Aguèt l'idèa de realizar de sortidas aerianas e de boxar lei balons jutjats impossibles de contraròtlar, çò que limitava lo risc d'error a proximitat de la gàbia. Inicièt tanben lei sortidas dau portièr en fòra de sa superficia per interceptar lei passas realizadas dins la prefondor dau jòc ò per passar pus aisament lo balon a seis atacaires. Pasmens, son apòrt major dins lo domeni ofensiu foguèt l'invencion de la relança rapida destinada a organizar una còntra-ataca rapida après la revirada d'una ataca advèrsa. Per facilitat aqueu ròtle, entraïnèt son jòc de pè per melhorar la precision de sei passas.

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]

  1. En 1954, 1955, 1957, 1959 e 1963.
  2. En 1953, 1967 e 1970.
  3. Lev Yashin participèt jamai ai competicions europèas car lo Dinamo i participèt pas durant son periòde d'activitat.
  4. En 1953, avans son orientacion definitiva vèrs lo fotbòl.