Bacin de Petén
Lo bacin de Petén es una region geografica de Mesoamerica situada dins la partida septentrionala de Guatemala. Centre major de la civilizacion maia, es uei una zòna d'interès toristica amb un nombre important de vestigis arqueologics.
Istòria[modificar | Modificar lo còdi]
Tre la premiera mitat dau milleni I avC, lo bacin èra un centre important de la civilizacion maia onte se trobavan lei ciutats de Nakbé, d'El Mirador, de Naachtun, de San Bartolo e de Cival. Durant lo periòde classic (vèrs 200 - 900 apC), la region èra probablament poblada per de milions d'abitants. En particular, s'i trobava la ciutat-estat de Tikal que fasiá partida dei poissanças maias pus importantas. Pasmens, l'intensivitat de l'agricultura necessària per produrre la norridura demandada per aquela populacion demeniguèt rapidament lei ressorsas dei sòus. Lo bacin conoguèt alora una lònga crisi alimentària e demografica ai sègles IX e X. Durant aqueu periòde, la populacion demeniguèt probablament de dos tèrç.
Après lo periòde classic, l'arribada de malautiás veïculadas per leis Espanhòus agravèt mai l'afondrament demografic. Ansin, en 1524-1525, quand Hernán Cortés agantèron per lo premier còp dins la region, i trobèron solament de vilatges e una populacion dispersada e pauc nombrosa. Pasmens, lei darrierei ciutats maias de l'endrech resistiguèron d'un biais acarnat fins a 1697 (Tayasal). Après la conquista, leis Espanhòus fondèron la vila de Flores en plaça de Tayasal.
Sites arqueologics[modificar | Modificar lo còdi]
Gràcias a son istòria rica, lo bacin de Petén presenta un nombre fòrça important de sites arqueologics majors :
- lòng dau riu Usumacinta : Uaxactún, Tikal (classat au Patrimòni Mondiau de l'Umanitat), Holmul, La Sufricaya, Machaquilá, Naranjo, Nakum, Piedras Negras e Altar de Sacrificios.
- lòng dau riu San Pedro Mártir : Waka.
- dins la region de Petexbatún : Ceibal e Aguateca.
- lòng dau riu La Pasión : Cancuén.
- lòng dau lac Yawha : Topoxté e Yaxhá.