Val de Vesera
La val de Vesera es una val situada dins lo Peiregòrd Negre, dins la region d'Aquitània en França.
Geografia[modificar | Modificar lo còdi]
Lo riu de Vesera, que balha son nom a la val, fa un camin entre de bauces de calcari cobèrts per de bòsques de castanhièrs e d'euses.
Vestigis preïstorics[modificar | Modificar lo còdi]
En un cinquantenat de quilomètres, la val de Vesera recampa qualques uns dels sites mai rics e mai celèbres de la Preïstòria europèa, que testimònia de 400 000 ans d'ocupacion umana.
En efièch, la region compòrta 147 jaces que remontan fins al Paleolitic, pas mens de 25 caunas ornadas. De centenats de milièrs de vestigis litics, ossoses e artistics i son estats descobèrts.
Presenta un interès excepcional d'un punt de vista etnologic, antropologic e estetic amb sas pinturas parietalas, en particular las de la cauna de Las Caus que sa descobèrta per azard per d'adolescents en 1940 marquèt una data dins l'istòria de la coneissença de l'art preïstoric. Aquesta cauna es estada escaissada la « Capèla Sixtina de la Preïstòria ». Sas parets presentan un centenat de figuras animalas, estonantas per la precision de l'observacion, la riquesa dels colorits e la vivacitat del rendut.
La comuna dels Aisiás es un autre naut luòc de la preïstòria. S'i pòt visitar las caunas de las Combarèlas e Font de Gaume, l'abric de Cap Blanc e mai los jaces de L'Aujariá Bassa e de L'Aujariá Nauta. Lo musèu del site de l'abric Pataud permet de comprene lo principi estratigrafic sul qual s'apuèjan los furgalhatges arqueologics.
Lo Musèu Nacional de Preïstòria presenta una de las colleccions mai complètas d'objèctes preïstorics. Tot pròche, lo ròc de Casela met en scèna la vida de sos ocupants, de la Preïstòria fins al sègle passat. Fòrça autres sites de la val de Vesera meritan d'èsser citats : al Mostièr, l'impressionant fòrt trogloditic de la Ròca de Sent Cristau que retraça 55 000 ans d'ocupacion sus 800 mètres de bauç ; a Tursac, l'abric de la Magdalena, susmontat d'un castèl medieval, e qu'a balhat son nom a la cultura magdaleniana ; citem encara, a Sarjac, los abrics de Castèl Mèrle e a Rofinhac la cauna de Rofinhac o « cauna dels cent mamots ».
Patrimòni Mondial de l'UNESCO[modificar | Modificar lo còdi]
La val de Vesera es estada classificada al Patrimòni Mondial de l'UNESCO en octobre de 1979. Aqueste vertadièr santuari de l'art preïstoric es un dels sites arqueologics pus importants d’Euròpa.
.svg){kind=small}
