Testudo hermanni

Un article de Wikipèdia, l'enciclopèdia liura.
Salta a la navegació Salta a la cerca
Fotografia d'una tartuga dei Moros.

La Tartuga dei Moros (nom scientific : Testudo hermanni), egalament dicha Tartuga d'Hermann[1], es una espècia de tartuga mediterranèa de la familha dei Testudinidae. Es presenta en Occitània dins quauqueis endrechs localizats en Provença.

Es una tartuga terrèstra pichona que sa talha varia de 18 a 30 cm. La clòsca, fòrça bombada, es caracterizada per de motius jaunes e sorns relativament simetrics sus la partida superiora e de bendas negras caracteristicas de l'espècia sus lo plastron. Espècia mediterranèa, la tartuga dei Moros es subretot presenta dins lei regions meridionalas dei Balcans e lòng dau litorau d'Itàlia, de Sicília, de Sardenha, de Corsega e deis Illas Balearas. De populacions isoladas existisson en Provença e en Catalonha. Erbivòra, utiliza son odorat per trobar lei plantas necessàrias a son alimentacion. L'ivernacion dura d'octòbre a març. Sei predators principaus son de mamifèrs coma lo taisson, lo rainard, la faïna ò lo rat e d'aucèus coma lei corvids.

La reproduccion pòu se debanar a de periòdes variats car la femèla es capable de gardar l'espèrme dins son aparelh reproductiu durant 5 ans. Quand lei condicions semblan favorablas, cava un nís dins la tèrra onte pond d'uòus. L'espelida a luòc après 60 a 75 jorns, generalament en setembre. Lo sèxe es determinat per la temperatura mejana dau nís. Lo nombre de naissenças es feble car leis uòus son cercats per mai d'un predator. La creissença de l'individú dura au mens 20 ans.

La tartuga dei Moros es una espècia domestica frequentament adoptada coma animau de companhiá. En revènge, dins la natura, es menaçada per la destruccion progressiva de son environament. Ansin, en 2020, èra classada coma « quasi menaçada ».

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]

  1. Aqueu nom provèn dau botanista francés Jean Hermann (1738-1800)