Vejatz lo contengut

Panzer I

Aqueste article es redigit en provençau.
Un article de Wikipèdia, l'enciclopèdia liura.

Panzer I Ausf. B dins un musèu chèc.

Lo Panzer I[1] es un carri leugier concebut per Alemanha dins lo quadre dau rearmament ordonat en 1933 per Adolf Hitler. Fòrça leugier (5,4 t), pauc blindat (6-13 mm) e armats de solament doas mitralhièras de 7,92 mm, èra destinat a l'entraïnament dei formacions blindadas de la Wehrmacht. Lo Panzer II, un pauc pus pesuc, èra destinat au meteis usatge. Pasmens, au començament de la Segonda Guèrra Mondiala, leis Alemands avián pauc de carris modèrnes e foguèron donc obligats d'integrar sei carris d'entraïnament dins sei tropas de combat[2]. Lo Panzer I participèt donc ai combats de la campanha de Polonha fins ai premierei batalhas de l'invasion alemanda dau territòri sovietic. Foguèt tanben engatjat durant la Guèrra Civiu Espanhòla.

Lei performàncias au combat dau Panzer I foguèron mitigadas car deguèt faciar de veïculs concebuts per una utilizacion sus lo prat batalhier. En Espanha, foguèt donc dominat per lo T-26 sovietic e, durant la Segonda Guèrra Mondiala, foguèt inferior ais autrei carris leugiers e son blindatge èra totalament insufisent per arrestar lei projectils anticarri. Pasmens, sa radiò permetiá s'assegurar la coordenacion deis unitats, çò qu'èra un avantatge decisiu còntra leis unitats blindadas advèrsas que dispausavan de sistèmas de comunicacion mens eficaç (drapèus, sinhaus visuaus...). De mai, la Wehrmacht aviá d'equipatges experimentats, çò que permetèt de compensar una partida dei feblessas dau Panzer I.

Totalament obsolèt en 1941, lo Panzer I demorèt utilizat per l'entraïnament, sa mission premiera, fins a la fin de la guèrra. D'estudis assaièron d'utilizar son quadre per concebre un carri capable de sostenir l'infantariá. Aquò menèt ai versions C, D, E e F que foguèron pas ò pauc produchas. Aquelei versions son fòrça diferentas dei versions A et B utilizadas au començament dau conflicte. En particular, la version F aviá un blindatge de 80 mm e una massa totala de 19 t. En plaça, leis Alemands preferiguèron utilizar de quadres de Panzer I per lei convertir coma caçaires de carris, canons automotors e veïculs antiaerians. De torrelas de Panzer I foguèron pereu installadas sus de fortificacions.

Liames intèrnes[modificar | Modificar lo còdi]

Bibliografia[modificar | Modificar lo còdi]

  • (en) Antonio J. Candil, « Soviet Armor in Spain: Aid Mission to the Republicans Tested Doctrine and Equipment », Armor, Fort Knox, US Army Armor Center,‎ març de 1999, pp. 31-38.
  • (en) Terry Gander, Tanks & Armour : Panzerkampfwagen I & II, Hersham, Ian Allen, 2006.

Nòtas e referéncias[modificar | Modificar lo còdi]

  1. Son nom oficiau èra « Panzerkampfwagen I ».
  2. (en) Peter McCarthy e Mike Syron, Panzerkrieg : The Rise and Fall of Hitler's Tank Divisions, Nòva York, Carroll and Graf, 2002, p. 51.