Florian Vernet
Florian Vernet (Besièrs, 19 d'abril de 1941) es un lingüista, pedagòg e escrivan occitan. Foguèt professor d'occitan a l'Universitat Pau Valèri de Montpelhièr abans de prendre la retirada en 2006. Es tanben un dels membres de l'Acadèmia Occitana-Consistòri del Gai Saber, a l'encòp del conselh lingüistic del Congrès Permanent de la Lenga Occitana e de l'Institut d'Estudis Araneses-Acadèmia Aranesa de la Lenga Occitana.
Biografia
Florian Vernet nasquèt en 1941 dins una familha que l'occitan de Besièrs s'i barrejava amb lo lengadocian meridional. Obtenguèt son Capès d'espanhòl en 1965 e en 1969 se n'anèt cap a Provença per trabalhar al licèu de Brinhòlas. Venguèt puèi, tres ans aprèp, ensenhaire d'occitan dins aquel quite establiment. Mai avant, tre 1975, trabalhèt tanben coma cargat de corses d'occitan a l'Escòla Normala de Draguinhan ont ensenhèt fins a 1988. Publiquèt mantuna de sas òbras en fulheton dins la pagina "Mesclum" del jornal La Marseillaise entre 1992 e 1997. Arribèt puèi a l'Universitat de Montpelhièr e en setembre de 1998 venguèt lo director del departament d'occitan. Son recuèlh de novèlas Vidas e engranatges li faguèt ganhar lo Prèmi Jaufre Rudèl en 2005. En 2011 donèt al Cirdòc una òbra manuscricha suls manlèus del francés a l'occitan.
Òbras
Narrativa
- Qualques nòvas d'endacòm mai. Tolosa: Institut d'Estudis Occitans, A tots 21, 1976.
- Miraus escurs e rabats de guingòi. [Tolosa?]: Institut d'Estudis Occitans, 1991.
- E freud dins aquò? seguit de My name is Degun. Tolosa: Institut d'Estudis Occitans, A tots-Crimis 126, 1995.
- Comedias provençalas = Comédies provençales (amb Gaspard Zerbin). Anglet: Atlantica, 2001.
- Ont'a passat, ma planeta? : seguit de Suça-sang connexion. Tolosa: Institut d'Estudis Occitans, 2001.
- Popre ficcion : Roman cosmico-marselhés. Tolosa : Institut d'Estudis Occitans, 2001.
- Vidas e engranatges, Puylaurens : Institut d'Estudis Occitans, A tots 166, 2004.
- J@rdin de las Delícias.com. Institut d'Estudis Occitans, A tots 177, 2007.
- La princesa Valentina e autres contes. CRDP, 2008.
- Fin de partida. IEO Lengadòc, Besièrs, 2013, 161 p.
- La nau dels fòls. Institut d'Estudis Occitans, A tots 204, 2016.
Lingüistica
- Petit lexique du provençal à l'époque baroque, Institut d'études niçoises & Centre d'études occitanes, 1996.
- Dictionnaire grammatical de l’occitan moderne. CEO, 2000.
- Dictionnaire grammatical de l'occitan moderne, selon les parlers languedociens. Montpelhièr: Universitat de Montpelhièr, 2004.
- Vocabulaire thématique français-occitan : Selon les parlers languedociens. Montpelhièr: Publicacions de Montpelhièr III, 2005.
- Que dalle! Quand l'argot parle occitan. Institut d'Estudis Occitans, 2007.
