Canon CAESAR
Lo camion equipat d'un sistèma d'artilhariá (CAESAR) es un canon automotor francés desvolopat durant leis ans 1990-2000 per GIAT Industries e Nexter. Intrat en servici en 2008 dins l'armada francesa, es constituit d'un canon de 155 mm, d'una longor de 52 calibres, montat sus un camion tot-terren. Cinc òmes son prevists per son foncionament mai aqueu nombre pòu èsser reduch a tres en situacion d'urgéncia. Lo veïcul pòu agantar una velocitat de 100 km/h sus rota e de 50 km/h en tot-terren. La portada dau canon varia de 4,5 a 50 km segon lo tipe d'obús utilizat e sa cadéncia de tir se situa entre 6 e 8 còps per minuta. Es tanben capable de realizar de tirs dirèctes fins a 2 000 m. Lo reglatge dau tir es realizat per una centrala inerciala e sa conducha per un calculator.
Lo canon CAESAR es estat utilizat per França durant plusors guèrras en Afganistan, en Mali e en Iraq. Aquò a permés de demostrar l'eficacitat d'aqueu materiau e a favorizat son exportacion vèrs d'autrei país coma Indonesia, l'Arabia Saudita, Tailàndia, Danemarc e Marròc. Ucraïna ne'n recebèt tanben quauqueis exemplaris durant sa guèrra còntra Russia. Certanei canons engatjats dins aqueleis armadas an conegut de combats coma en Iemèn ò lòng de la frontiera entre Tailàndia e Cambòtja.