Arno Peters

Un article de Wikipèdia, l'enciclopèdia liura.
Anar a : navigacion, Recercar
Projeccion Gall-Peters, autor Penarc
Las termièras esquèrra e dreta de la mapa de Peters que son dens l'estreit de Bering, atau Russia tota qu'ei amuishada suu costat que cau. Greenwich gran cercle Estreit de Bering gran cercle (traucant Floréncia en Italia, véder Florence meridian)/ Verd: Longitud de Greenwich e la vielha linha de cambiament de data. Roi: Longitud de Floréncia e la linha de Peters de cambiament de data. autor Watchduck

Arno Peters (Mai 22, 1916 – Deceme 2, 2002) qu'a desvolopat ua mapamonde dita la "Mapa deu Monde de Peters". Aquesta mapa qu'ei basada sus la projeccion cartografica dita uei de Gall–Peters.

Arno Peters qu'ei un istorian e geografa alemand vadut a Berlin lo 22 de mai de 1916. Que comencè la soa carrièra a Hollywood a la fin deus ans 1930 en estudiar la realizacion, l'industria e l'art cinematografics en America. Un còp doctor de l'universitat Friedrich-Wilhelm en 1942, Peters que comença los sons recèrcs en ua istòria deu monde sincronoptica.

Joenessa[modificar | modificar la font]

Arno Peters que's passa lo joenèr a Berlin, en Alemanha dab lo hrair, Werner e los pairs Lucy e Bruno. Que recebèvan sovent convidats estrangèrs e qu'ei atau qui coneishó l'activisme sociau pr'amor deu ròtle deus pairs en la movença sindicau[1].

Lo pair qu'estó incarcerat un temps brac peu regim Nazi a la fin de la Dusau Guèrra mondiau. Peters que si hasè dab astre au licèu autant com ciclista que com nadaire[1]. Que practiquè d'alhors la natacion e la plonjada dinc a 85 ans tot dòi abans la soa mort.

Un còp tornat en Alemanha, arron estudis de cinèma a Hollywood, que podó Peters melhorar lo procèssus de produccion cinematografic alemand e en 1940 que sortí lo film, "Immer Nur Du" ("Juste tu tostemps "), ua comedia musicau modèrna. Qu'èra, aus 25 ans, lo cineasta mei joen d'Alemanha.

Apòrts[modificar | modificar la font]

En 1942 Peters[2] qu'obtienó un doctorat, dab ua tèsi sus la propaganda politica a la Friedrich-Wilhelm University (uei Humboldt University de Berlin), en istòria e jornalisme. Aquesta idea que'u viengó d'abòrd a l'universitat on l'expausè largament en la tèsi titolada Film as a Means of Public Leadership. Que passè un gran temps de la soa vita a l'universitat, en estudiar l'istòria mondiau de mòda sincronoptica: qui s'interèssa egaument a totas las parts deu planeta. Aquestes estudis que'u hasón concéber la soa cronologia d'ua istòria mondiau sincronoptica. Ua istòria qui considèra que consacra un espaci e un temps egaus e simultanèus a totas las parts e totas las votz deu monde, encamarlant lo temps istoric de 1000 ab. J.-C. dinc a 1952 ap. J.-C. Ua istòria apitada sus l'idea que totas las civilizacions e país e son en relacions e influéncias simultanèas. Peters que tribalhè hòrt sus la soa mapa deu monde autanlèu en 1967, e non ne'n parlè pas dinc a la conferéncia de premsa de Bonn en mai de 1973[3]. En 1974 Peters que fondè l'Institute for Universal History a Bremen, Alemanha, dont èra director. Qu'estó distinguit com professor onorari per l'Universitat de Bremen e que tribalhè a Bremen dinc a la soa mort lo 2 de deceme de 2002[4].

Ua esbaucha de la soa mapamonde qu'estó publicada en 1952[5].

En la mestior qu'a contribuit a amuishar, Peters, lo biais eurocentric, nòrd emisferic e etnocentric de la màger part de las mapas despuish los cartografas davancèrs e Gerardus Mercator (un flamenc que hasèva meilèu ua mapa per la navigacion). Mauaisit qu'ei solide e jamei satisfasent de representar la tèrra o tot còs celèste sus ua susfàcia plana. La projeccion de dadas geograficas deu modèle ellipsoïde de la Tèrra de cap a un sistèma de coordonadas planas qu'a tostemps com consequéncia la desformacion de las areas, de las fòrmas, de las distàncias e d'autas proprietats. En causir tau o tau projeccion l'utilizator que pòt preservar dadas que l'impòrtan mes per fòrça au detriment d'autas[6]. Aquesta causida dens las projeccions cartograficas qu'ei màgerment, au finau, l'expression de causida politicas.

Pr'amor non trobava nada mapa satisfasenta, Peters que desvolopè la soa. En 1974 que sorteish la Mapa deu monde de Peters, qui pretend a la representacion mei precisa deu planeta. Qu'estó ua partvirada dens lo biais de pensar lo monde e hòrt d'organismes non governamentaus tèrç mondistas que l'utilizaràn d'ara enlà.

Aquesta mapa que creè d'auta part ua controvèrsia. La projeccion de mapa que Peters a dit aver desvolopat, qu'èra estada mei o mensh presentada jà un sègle mei abans[7] peu Reverend James Gall, escocés qui s'inspirava eth medish de tribalhs anteriors (deu soïsses Lambert per exemple). A maugrat Peters e reïvindiquèsse la mapa com la "de Peters", la soa projeccion non èra prumèra qui pause lo principi d'ua representacion mei justa au par de la realitat. Uei que parlan de la projeccion Gall-Peters.

La projeccion que desvolopè que da en efèit ua representacion talha-exacta de las tèrras emergidas. Que permet que tienen tots los continents e país ua egau representacion. Que torna plaçar l'equator au miei e que cambia significativament la vision socializada e globalizanta d'un monde europèocentrat. La projeccion de Peters qu'essaja de s'afranquir de l'imatge eurocentric deu monde, capabla de representar las latitudas hautas dinc aus 90º. Las destorçudas minoras que's tròban en las latitudas mejanas, on viven la màger part de la gent. Aquesta projeccion que permet de representar la superficia reau de las tèrras, mes fòrmas e distàncias que'n son modificadas. Qu'existeish ua version modificada de la mapa, dont son mensh desformadas los contorns. Mei de 80 milions de mapas de Peters que's son venudas de per lo monde pr'amor que constituiva ua responsa que cercavan la gent. Las mapas apeadas sus la projeccion Peters que son promovudas per l'UNESCO, e que son largament utilizadas en las escòlas britanicas[8]. En 1989 Peters que publiquè The Peters Atlas of the World, qui d'aqueth temps, èra lo sol atlàs a representar totas las zònas sus ua medisha escala proporcionada a las lors areas reaus.

Que podem citar tanben la "Carte du Monde: l'Homme et le développement"[9] apeada en 1997 sus la projeccion deu professor de cartografia de Brussèlas Frank Canters[10].

Véder tanben[modificar | modificar la font]

   Meridian 11°15' Èst

Bibliografia[modificar | modificar la font]

Referéncias[modificar | modificar la font]

  1. 1,0 et 1,1 http://www.odt.org/album.htm
  2. http://catalogue.bnf.fr/ark:/12148/cb12390402m]Notícia d'autoritat BnF
  3. Monmonier, Mark (2004). Rhumb Lines and Map Wars: A Social History of the Mercator Projection. University of Chicago Press. p. 147. ISBN 0226534316.
  4. http://www.yusthaus.com/petersmap/History/Obituary.html
  5. http://newint.org/features/2003/01/05/arno/
  6. 9 Projections cartographiques et systèmes de références [Mapyear.org/files/wom/09 IMY WoM fr.pdf mapyear.org/files/wom/09_IMY_WoM_fr.pdf]
  7. Pareishuda peu prumèr còp en 1856, publicada en lo "Polish Geographical Magazine" e presentada en 1885 a l'associacion britanica per l'avançament de la sciéncia.
  8. Higgins, Hannah B. The Grid Book. Cambridge, Massachusetts: MIT Press, 2009. ISBN 9780262512404 p.94. "Embroiled in controversy from the start, the map is nonetheless widely used in the British school system and is promoted by the United Nations Educational and Scientific Cultural Organization (UNESCO) because of its ability to communicate visually the actual relative sizes of the various regions of the planet."
  9. http://www.worldcat.org/title/carte-du-monde-lhomme-et-le-developpement-la-projection-de-canters/oclc/637862289
  10. https://commons.wikimedia.org/wiki/File:Canters_Polyconic_Map.png
  11. Ligam permanent per Histoire mondiale synchronoptique

Ligams extèrnes[modificar | modificar la font]