Suillus collinitus
Pissacan
Suillus collinitus
(Fr.) Kuntze, 1898
LC : Preocupacion menora
Suillus collinitus (nom vernacular : pissacan) es un bolet de la familha dei Suillaceae e dau genre dei Suillus. Es una espècia fòrça frequenta dins lei seuvas de pins dei regions mediterranèas. Es un bolet comestible, mai sa consumacion es venguda rara.
Descripcion
[modificar | Modificar lo còdi]Es un bolet de talha mejana que pòu agantar 4 a 8 cm d'autor. Lo capèu a un diamètre de 5 a 11 cm e es brun clar a brun-gris omogenèu, verjurat de negràs. Ven viscós amb l'umiditat. Lei tubes son inicialament jaunes e vènon pauc a cha pauc olivastres. Secretan un latèx blancàs a l'estat jove. Lei pòrs son pichons, angulós e de la meteissa color que lei tubes. Pòdon prendre una coloracion rolh dins leis endrechs tocats per lo latèx. Leis espòras son de color brun tabac olivastre e an un diamètre mejan de 4 a 10 µm. Lo pè es cilindrinc a un diamètre de 1 a 2 cm. Sensa anèu, a una basa ponchuda. Sa color varia entre lo jaune e lo blancàs amb de granulacions brun-gris a brun rolh. La basa es sovent ròsa en causa de la color particular dau micèli. La carn es jaunassa amb de zònas jaune viu au nivèu dei tubes e a la basa dau pè. Es immudabla e ven rapidament mòu. L'odor es febla e la sabor es doça.
Ecologia
[modificar | Modificar lo còdi]Lo pissacan es generalament associada amb lei pins, especialament lo pin d'Alèp, dins lei regions cauquieras. Es fòrça frequent dins lei regions mediterranèas a l'autona.
Comestibilitat
[modificar | Modificar lo còdi]Lo pissacan es un comestible mediòcre. Foguèt lòngtemps recoltat e consumat dins lei regions mediterranèas, mai l'interès per aqueu bolet demeniguèt après leis ans 1970. La catastròfa de Chernobil entraïnèt la quasi disparicion de sa consumacion. D'efiech, coma leis autrei Suillus, es una espècia que capta aisament lei metaus pesants e leis elements radioactius presents dins lo sòu. Pòu donc venir toxicas dins lei regions polluïdas. De mai, sa preparacion es complèxa car demanda de recuperar unicament la carn dau capèu après aver levat lo revestiment e lei tubes. La cuecha es tanben lònga car lo bolet rend de quantitats importantas d'aiga. Lei micològs actuaus conselhan donc de defugir sa recòlta.
Confusion
[modificar | Modificar lo còdi]I a ges de risc de confusion amb un bolet toxic. Pasmens, es possible d'o confondre amb leis autreis espècias de Suillus que son dichas pissacan. En particular, Suillus granulatus es un bolet fòrça similar qu'es tanben un comestible mediòcre.
Annèxas
[modificar | Modificar lo còdi]Liames intèrnes
[modificar | Modificar lo còdi]Bibliografia
[modificar | Modificar lo còdi]- (fr) Didier Borgarino e Christian Hurtado, Champignons de Provence et du Midi méditerranéen, Éditions Édisud, Sant Romieg, 2020.