Reclams
Reclams (a l'origina Reclams de Biarn e Gascounhe) es una revista occitana, nascuda en Gasconha en 1897 jos l'auspici de l'Escòla Gaston Febus, escòla felibrenca "bearnesa e gascona", coma se disiá alaidonc. Participèron a sa fondacion los grands escrivans e intellectuals gascons que foguèron Miquèu de Camelat e Simin Palay, que i tenguèron la primièra plaça de las annadas 1920 a 1950.
L'apogèu dels Reclams se situa dins las annadas 1920 e 1930, mercés al grand trabalh de Miquèu de Camelat que n'èra secretari.
Camelat fasent-se vièlh pensèt a un jove escrivan armanhaqués, Andreu Pic, per li succedir, mas malurosament aqueste moriguèt en 1958 e foguèt fin finala l'abat Sent-Besard qu'aguèt la responsabilitat de prene la seguida de Camelat. Jos son secretariat, que cobrís totas las annadas 1960 e 1970, los Reclams coneguèron un declin.
Al començament de las annadas 1980, la revista e l'associacion passèron entre las mans de Jan Salas-Lostau que dobriguèt mai largament los Reclams a la grafia classica. Son trabalh foguèt continuat per Jan Eigun, puish, a comptar de la fin de las annadas 1990, per la còla d'Eric Gonzales, Sèrgi Javaloyès, los fraires Eric e Nicolau Rei Bèthvéder, Estela Comellas e Maurici Romieu, que son apòrt es estat de dubrir la revista, qu'èra duscas aquí escricha gaireben tota en gascon, als autres dialèctes occitans. Lor trabalh es coordinat dempuèi 2006 per un navèth cap-redactor, Jan Loís Baradat.
Los Reclams aculhisson uèi encara d'escrivans contemporanèus, joves o confirmats, de totes los recantons d'Occitània.
Ligams extèrnes
[modificar | Modificar lo còdi]- (oc) (fr) Sit de la revista
.svg){kind=small}