Prospèr Estieu

Prospèr Estieu a la fin del sègle XIX (per Eugèni Trutat)

Retrach de Prospèr Estieu dins l'Istòria del Felibritge de G. Jordana)

Prospèr Estieu (Fendelha, Lauragués, 7 de julhet de 1860 - Pàmias, 11 de decembre de 1939) foguèt un escrivan, jornalista e subretot poèta occitan, activitats que portèt a mai de sa profession de regent. Es un personatge fòrça important dins la recuperacion de la grafia occitana modèrna qu'es a partir de son escritura e d'Antonin Perbòsc que s'establiguèron las fondamentas de la grafia elaborada e divulgada per Loís Alibèrt mai tard.

Biografia[modificar | modificar la font]

Prospèr Estieu nasquèt a Fendelha en 1860 dins una familha pagesa paura de Lauragués. Anèt al collègi a Castèlnòu d'Arri puèi al petit seminari de Carcassona abans de dintrar a l'Escòla Normala de la vila. De jove fondèt una revista de poesia Poésie moderne que i collaborava amb son amic August Forés. Trabalhava coma regent dempuèi 1879. En 1892 creèt l'Escòla Audenca a Carcassona. Fondèt tanben la revista Montsegur. Amb lo catalan Josep Aladern foguèt codirector de la revista Occitania.

Son òbra coneguèt una influéncia fòrta del romantisme e subretot de las òbras de Victor Hugo. La reforma ortografica que prepausèt amb Perbòsc s'enfrontèt a una oposicion ostila del felibritge provençal. Prenguèt sa retirada a Castèlnòu d'Arri en 1923 e ailà creèt los Grilhs del Lauragués. Demest sas autras contribucions a la causa occitana cal citar la creacion del Coletge d'Occitania en 1927.