Maschinengewehr 42
La Maschinengewehr 42 (designacion sovent abreujada MG42) èra una mitralhièra alemanda de la Segonda Guèrra Mondiala. Considerada coma la melhora mitralhièra dau conflicte, èra una arma polivalenta, eficaça, fisabla, aisada de produrre e pron leugiera per acompanhar leis assauts d'infantariá. Èra tanben apreciada per son importanta cadéncia de tir (1200 a 1500 tirs per minuta).
Son introduccion sus lo prat batalhier permetèt de corregir lei defauts de la MG34 qu'èra una arma similara mai de fabricacion pus complèxa e pus onerosa. Après la guèrra, la MG42 inspirèt la concepcion dei mitralhièras contemporanèas coma la M60 estatsunidenca ò la FN Minimi bèlga. De mai, de versions leugierament modificadas per leis adaptar ai municions actualas son totjorn en servici dins mai d'una armada (Alemanha, Espanha, Turquia, Paquistan... etc.).