Jardin dels Felibres

Lo Jardin dels Felibres es un jardin que se tròba dins lo parc de Sceaux dins aquesta vila francesa, a ras de la glèisa ont se tròba la tomba de Florian, autor cevenòl de divèrsas faulas. L'endrech es ondrat de bustes dels autors e actors mai representatius del Felibritge universal o parisenc.

Lo Jardin a un ròtle important dins la celebracion dels eveniments occitanistas que se realizan a Sceaux, ciutat que ven la capitala de l'occitanisme parisenc a la fin de la prima. S'i accedís a partir de l'avenguda del President Franklin D.Roosevelt.

Istòria

Foguèt en 1879 que se creèt lo Jardin dels Felibres a Sceaux gràcias a una idèa de l'escrivan provençal, Pau Arena, membre important del Felibritge de París per i poder transportar las rèstas de Florian qu'èran estadas servadas dins lo jardinet de la glèisa aprèp la destruccion en 1806 del cementèri ont restava lo poèta lengadocian.

Dempuèi lo sègle XIX, los representants de l'occitanisme a París s'i amassan cada an, un dimenge del mes de junh per omenatjar la figura de Florian. Lo primièr bust que seguiguèt lo de Florian, foguèt lo bust del felibre de Malhana, Frederic Mistral.

Lo lòc coneguèt una remodelacion que s'acabèt en mai de 2004 (an que marcava lo centenari de l'obtencion per Mistral del Prèmi Nobel de Literatura) per i apondre lo bacinet de la glèisa. S'i plantèron tanben de falabreguièrs còsta la glèisa per ramentar l'origina occitana dels poètas.

Lo Jardin ten actualament onze bustes en comptar lo de Florian.

Los bustes

A mai dels bustes de Florian e dels escrivans màgers del Felibritge coma Mistral o Aubanèu, se pòt veire dins lo Jardin d'omenatges als divèrses escrivans occitans exilhats a París coma Pau Arena, Josèp Lobet, Clovís Hugues, Sextius Michel, Pau Marieton o mai als politicians Joan Carles Brun, Pèire Deluns-Montaut e Maurici Faure.