Isaac lo Bòrni

Un article de Wikipèdia, l'enciclopèdia liura.

Isaac lo Bòrni, ò Itzhak Saggi Nahor (1160, Posquiera - 1235) es un teologian judieu de la segonda mitat de l'Edat Mejana, figura majora dau movement cabalista.

Fiu dau rabin Rabad III, Itzhak Saggi Nahor èra bòrni de naissença. Pasmens, aquò l'empachèt pas de venir professor a l'escòla rabinica de Posquiera. Segon la tradicion, recebèt leis ensenhaments secrèts de son paire eiretadas per lo movement cabalista dempuei l'epòca de Moïses. Segon leis istorians, s'interessèt a la vision mistica dau judaïsme qu'èra a aparéisser dins certanei regions d'Euròpa Occidentala après la publicacion dau libre Sefer HaBahir a la fin dau sègle XII. Ne'n venguèt rapidament lo premier teorician important amb una teologia basada sus l'idèa d'un Dieu influenciabla, falhibla e perfectibla victima d'una « falha » a l'origina dei malurs dau mond. Per la reparar, èra necessari d'estudiar lo lengatge de la Torah e dei tèxtes sacrats, imperfècts car d'origina umana, per assaiar de tornar trobar lo « mot divin » escondut dedins.

Aqueu trabalh se difusèt fòrça en Occitània, en Catalonha e en Espanha avans de se difusar dins lo rèsta de la comunautat judieva. I foguèt a l'origina de la formacion de la Cabala, movement esoterica gropant lei continuaires d'Isaac lo Bòrni. En oposicion amb la vision pus empirica desvolopada per de filosòfs sabent coma Maimonides (1138-1204), la Cabala declinèt a partir dau sègle XVI mai una partida de sa vision mistica participèt a la formacion dau judaïsme modèrne.

Liames intèrnes[modificar | Modificar lo còdi]

Bibliografia[modificar | Modificar lo còdi]

Nòtas e referéncias[modificar | Modificar lo còdi]