Guèrra d'Acre
|
Guèrra d'Acre
| |
|---|---|
 | |
| Informacions generalas | |
| Data | 1899-1903 |
| Luòc | Territòri d'Acre |
| Casus belli | Desacòrdis frontaliers entre Bolívia e Brasil |
| Cambiaments territorials | Annexion dei territòris contestats per Brasil |
| Eissida | Victòria brasiliana |
| Belligerants | |
 Bolívia
|
 Brasil
|
La Guèrra d'Acre es un conflicte frontalier que se debanèt de 1899 a 1903 entre Bolívia e Brasil. Son enjòc èra lo contraròtle dau territòri d'Acre e de sei ressorsas naturalas (aur, cauchó... etc.). S'acabèt per una desfacha boliviana que permetèt a Brasil d'annexar de regions revendicadas per Bolívia e per Peró.
Segon lei tractats de Madrid, de San Ildefonso - Tratado de Permuta e de Badajoz respectivament signats en 1750, en 1777 e en 1801, lo territòri d'Acre, situat dins la Seuva Amazonica, èra sota sobeiranetat espanhòla. Pasmens, la presa de contraròtle èra pas effectiva e lei limits territòriaus mau definits. Après l'afondrament deis empèris coloniaus en America dau Sud, de negociacions aguèron luòc entre lei diferenteis estats de la region. En parallèl, cada país acomencèt d'i installar de pòstes militars e de fòrças de polícia per far reconóisser sei drechs.
En 1899, l'installacion d'un pòste bolivian en Puerto Alonso entraïnèt de tensions vivas ambé Brasil car l'administracion boliviana podiá taxar de companhiás brasilianas installadas dins lo territòri contestat. Lo govèrn brasilian reconoguèt lo traçat frontalier revendicat per Sucre. Enterin, dins la region d'Acre, una insureccion probrasiliana organizada per lei plantaires d'evèa expulsèt l'administracion boliviana.
Per tornar ocupar lo territòri d'Acre, Bolívia assaièt d'obtenir un sostèn angloestatsunidenc per utilizar la fòrça sensa entraïnar de repòsta brasiliana. Leis insurgents proclamèron alora l'independéncia d'Acre mai lei protestacions internacionalas permetèron pas a Brasil de sostenir activament aqueu projècte. En 1900, lei Bolivians poguèron reconquistar la region. Dins lo corrent de l'annada, i rebutèron una expedicion de volontaris brasilians venguts de Manaus. Pasmens, en julhet de 1901, adoptèron de reglas comercialas fòrça desfavorablas ais interès brasilians.
Aquò entraïnèt una reaccion viva dau Congrès de Brasil e una guèrra vertadiera acomencèt dins la region. En aost de 1902, una insureccion novèla dei plantaires permetèt d'assetjar lei fòrças bolivianas de Puerto Alonso. En febrier de 1903, lei Bolivians capitulèron e l'independéncia d'Acre foguèt tornarmai proclamada. Après aquelei combats, de negociacions acomencèron e lei Bolivians acceptèron d'abandonar lei territòris perduts en cambi d'indemnitats. De discussions se debanèron tanben entre Brasil e Peró regardant lei regions d'Acre revendicadas per Lima. Una comission comuna i establiguèt una autoritat partejada en 1904 avans de definir lo traçat de la frontiera dins lo corrent deis annadas seguentas[1].
Liames intèrnes
[modificar | Modificar lo còdi]Bibliografia
[modificar | Modificar lo còdi]Nòtas e referéncias
[modificar | Modificar lo còdi]- ↑ D'escaramochas opausèron Brasilians e Perovians dins certanei sectors mai lo resultat dei combat confirmèt lei revendicacions brasilianas.