Francis Drake
Francis Drake (vèrs 1540, Tavistock - 27 de genier de 1596, Portobelo) es un explorator, un corsari e un òme politic anglés de la segonda mitat dau sègle XVI. Anoblit per la rèina Eisabèu Ièra (1558-1603), aguèt un ròtle important dins l'emergéncia e la formacion de la poissança navala anglesa amb plusors victòrias importantas còntra leis Espanhòus.
Eissit d'una familha de païsans protestants victimas de persecucions religiosas, foguèt plaçat per son paire dins la marina marchandas a 12-13 ans. Vèrs 1560, recebèt una barca coma eiretatge après la mòrt de son capitani e s'engatjèt dins lo comèrci triangular. Durant aqueu periòde, se bateguèt còntra leis Espanhòus e decidèt de venir corsari vèrs 1570. Fins a 1573, menèt plusors expedicions còntra lei colonias espanhòlas d'America e i enregistrèt d'importants succès. Menaçat per una prima de 20 000 ducats [1], deguèt demorar escondut entre 1573 e 1575.
Pasmens, foguèt convocat per Eisabèu Ièra en 1575 per organizar d'atacas novèlas còntra lei colonias espanhòlas. Dirigida vèrs America e l'Ocean Pacific, aquela expedicion realizèt la premiera circonnavigacion anglesa. Au nivèu militar, l'operacion permetèt la captura de plusors galions e lo pilhatge d'establiments litoraus en Chile e en Peró. A son retorn, lo tesaur entornat per Drake èra superior ai revenguts annuaus de la corona. En 1581, lo navegaire foguèt abobat chivalier per la rèina. La meteissa annada, foguèt elegit premier cònsol de Plymouth e parlamentari.
En 1585, una guèrra novèla comencèt entre Anglatèrra e Espanha. Drake foguèt tornarmai encargat de menar una ataca victoriosa còntra lei colonias espanhòlas d'America Centrala. Pasmens, lo succès de son expedicion menèt lo rèi Felip II d'Espanha a organizar una invasion dirècta deis Illas Britanicas. Vice comandant de la flòta anglesa, Drake participèt a la defensa de l'archipèu còntra l'ataca de l''Invincible Armada en 1588.
Après aquela victòria, Drake e John Norreys recebèron lo comandament d'una flòta destinada a perseguir lei naviris espanhòus en fugida avans d'anar sostenir lei rebèls portugués de Lisbona e d'atacar leis Açòres. Dins aquò, l'expedicion se turtèt a una resisténcia eficaça e foguèt victima de plusors epidemias. Perdiguèt au mens 30 naviris e 13 000 òmes sensa obtenir de succès decisiu.
Aquela desfacha lo privèt de comandament dins la flòta anglesa durant sièis ans. Fin finala, poguèt tornarmai organizar una expedicion en America en 1595. Pasmens, subiguèt plusors desfachas. Moriguèt au larg de Portobelo en genier de 1596 en causa de la dissentariá.
Liames intèrnes
[modificar | Modificar lo còdi]- Corsari.
- Golden Hind, naviri de Drake utilizat durant sa circonnavigacion.
Bibliografia
[modificar | Modificar lo còdi]- (en) Sam Bawlf, The Secret Voyage of Sir Francis Drake, 1577–1580, Walker and Co., 2003.