Eric Fraj

Eric Fraj
Eric Fraj

Naissença

28 de decembre de 1956 a Bailleul (Flandra)

País d’origina

Occitània

Profession(s)

cantaire (autor-compositor-interprèt)

Genre(s)

cançon occitana

Identificants

Eric Fraj (Bailleul, Flandra, 28 de decembre de 1956), es un cantaire e autor occitan contemporanèu que tanben canta qualques cançons en catalan, francés o espanhòl.

Biografia[modificar | Modificar lo còdi]

Eric Fraj passèt una part de son enfància a viatjar entre Senegal, Nigèr, Flandra e Bordèu, que son paire èra militar. Eric Fraj entamenèt sa carrièra musicala a Bordèu en 1971, qu'aviá pas encara quinze ans, dins las velhadas organizadas pel Cercle dels Joves Occitans, puèi en primièra partida d'un concèrt de Claudi Martí. Viu dins lo país tolosan, ont ensenhèt longtemps l'occitan, l'espanhòl e la filosofia, al licèu Pèire d'Aragon de Murèth. Es un cantaire plan conegut, que cantèt dins Occitania tota, mas tanben en Catalonha, Andòrra, País Valencian, Marròc, Bretanha, París, Alemanha, Corsega, Euzkadi (País Basc), pertot ont la vida lo buta. Canta de poèmas de grands autors e grandas autoras d'Occitania (coma Joan Bodon, Robèrt Martí, Domenica Decamps, André du Pré, Danièla Estèbe-Hoursiangou, Joan-Claudi Forêt, Joan-Loís Baradat, Joan Rigosta, Andrieu Lagarda, Antonin Perbòsc, Miquèl Decòr, Arnaud Daubassa, Ramon Busquet, Bernat Sicart de Maruèjols, Pèire Cardenal, Raimbaut de Vaqueiras, Marcèu Esquieu, Rodland Pecot, Clausi Sicre, Leon Còrdas) o d'endacòm mai (François Villon, Rutebeuf, José-Manuel Caballero Bonald, Jaime Siles, Vicente Núñez, Bertolt Brecht, Federico Garcia Lorca, Gabriel Crespo) que metèt en musica. Interprèta tanben de tèxtes personals. Sa musica s'enrasiga e s'endralha dins un mond mediterranèu e sa votz s'inspira del cant liric. En 2000, interpretèt lo ròtle del trobador Jaufre Rudèl dins "L’Amour de Loin", espectacle escrit e mes en scèna pel guitarrista, cantaire e compositor Vicente Pradal. En genièr de 2005 cantèt amb Lluís Llach la cançon A força de nits a Tolosa (sala Nougaro).

Creacions[modificar | Modificar lo còdi]

Eric Fraj es tanben creaire de mantun espectacle que s'i barrejan teatre e musica. Participèt en 2006 a l'Estivada de Rodés. En 2010 creèt l'espectacle Pep el mal, una mena de represa d'un espectacle anterior (Marrano) que se fondamenta sus l'istòria de son grand, lo paire de son paire, originari d'Alcoi (País Valencian) qu'emigrèt cap al nòrd per etapas e s'implantèt finalament a L'Avelhanet. Aqueste foguèt representat en mai de 2010 al teatre Daniel Soriano de Tolosa.

Es acompanhat per divèrses musicians coma Guilhem Lopez o Jean-Raymond Gélis.