Coire natiu
Lo coire natiu es un minerau roge. D'una duretat situada entre 2,5 e 3 e d'una densitat de 8,95, es compausat de coire pur que forma de cristaus cubics. Pasmens, lei cristaus son en realitat relativament rars dins la natura e lo coire natiu se presenta puslèu sota la forma d'arborescéncia ò d'agregats. Son esclat es metallic, mai la color roja pòu de còps evolucionar vèrs lo verd ò lo negre en causa de fenomèns d'oxidacion. Es soluble dins l'acid nitric e colora una solucion d'amoniac en blau. Es pas fluorescent.
Geologicament, lo coire natiu se forma dins lei zònas d'alteracion dei jaciments de sulfurs de coire ò, pus rarament, dins lei cavitats de ròcas basalticas. Es ansin sovent associat amb de mineraus cuprifèrs coma la bornita, la cuprita, la malaquita e l'azurita e amb lei mineraus associats a aquelei compausats (calcita, epidota, etc.). Lei jaciments importants son rars. Lei cristaus pus famós vènon generalament deis Estats Units, de Canadà, de Chile, de Bolívia, de Zambia e dei Monts Orals. Foguèt istoricament utilizat durant lo Calcolitic (ò Edat dau Coire) per renforçar d'otís de pèira. Uei, lo coire natiu interèssa subretot lei colleccionaires car d'autrei mineraus permèton de produrre de coire.
Liames intèrnes[modificar | Modificar lo còdi]
Bibliografia[modificar | Modificar lo còdi]
- (fr) Nicola Cipriani (trad. Marie-Hélène Alfonsi e Catherine Sobecki), Minéraux et Roches, París, Gründ, 1996.