Alicia Moreau de Justo

Un article de Wikipèdia, l'enciclopèdia liura.
Salta a la navegació Salta a la cerca
Fotografia d'Alicia Moreau de Justo en 1972.

Alicia Moreau de Justo (11 d'octòbre de 1885, Londres - 12 de mai de 1986, Buenos Aires) èra un mètge e una frema politica argentina. Foguèt una figura majora dei movements feminista e socialista de son país.

S'interessèt a la causa femenina tre sa jovença e participèt a partir de 1902 a la fondacion dei premiereis organizacions feministas d'Argentina. Puei, ambé l'ajuda de son paire, participèt tanben a la creacion d'escòlas popularas. Enfin, acomencèt una carriera de jornalista au sen de la premsa progressista.

En 1914, acabèt seis estudis de medecina e venguèt militanta dau Partit Socialista quauqueis annadas pus tard. I rescontrèt son marit, Juan B. Justo (1865-1928[1]), e lo pareu aguèt tres enfants. En 1918, aguèt un ròtle important dins la fondacion de l'Union Feminista Nacionala. Aquò li permetèt de defendre d'un biais pus eficaç lei drechs dei fremas (vòte, drechs sociaus, accès a la santat, accès a l'educacion publica... etc.). En particular, en 1932, foguèt a l'origina dau projècte de lèi que permetèt de donar lo drech de vòte ai fremas argentinas en 1947. Critica dau peronisme, participèt a la scission dau Partit Socialista en 1958.

Contunièt son combat politic au sen dau Partit Socialista Argentin. En 1975, foguèt una dei fondatritz de l'Assemblada permanenta dei drechs de l'Òme, organizacion non governamentala que luchèt e denoncièt lei crimes de la dictatura militara. Sostenguèt tanben d'autrei movements ostils au regime militar coma lei Maires de la Plaça de Mai.

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]

  1. Fondator dau Partit Socialista, foguèt deputat de 1912 a 1924 e senator de 1924 a sa mòrt.