A7V

Un article de Wikipèdia, l'enciclopèdia liura.
Salta a la navegació Salta a la cerca
Fotografia d'un A7V en 1918.

Lo Sturmpanzerwagen A7V es un carri alemand desvolopat durant la Premiera Guèrra Mondiala (1914-1918). Iniciada en 1916, sa concepcion dispausèt de mejans relativament febles car lo comandament superior de l'armada alemanda èra pauc interessat per lo desvolopament de l'arma blindada. Lo premier exemplari intrèt donc pas en servici avans lo 1èr d'octòbre de 1917 e la produccion foguèt limitada a 20 unitats.

L'A7V èra un veïcul pesuc (33 tonas) armat d'un canon de 57 mm e de sièis mitralhièras[1]. L'equipatge compreniä 18 a 19 òmes protegits per un blindatge frontau de 30 mm. Lei dimensions dau carri èran donc fòrça importantas (7,35 m de longor, 3,06 m de largor e 3,35 m d'autor) e pauc adaptadas au prat batalhier. Pasmens, la feblessa pus importanta de l'A7V èra sa garda au sòu de solament 4 cm que limitava son utilizacion a de terrens quasi liscs.

Lei participacions de l'A7V ai combats foguèron raras car leis Alemands preferiguèron utilizar de blindats britanics per constituïr seis unitats de carris. De mai, lo blindatge èra pas capable d'arrestar leis obús anticarri dau periòde. Pasmens, l'A7V foguèt actor dau premier combat de l'istòria entre doas formacions blindadas a la segonda batalha de Villers-Bretonneux (24-26 d'abriu de 1918). Lo rescòntre opausèt tres Mark IV còntra tres A7V e s'acabèt per la destruccion d'un carri alemand.

Liames intèrnes[modificar | modificar la font]

Bibliografia[modificar | modificar la font]

  • (en) George Forty, Tank Action from the Great War to the Gulf, Alan Sutton Publishing Ltd., 1995, pp. 39–47.

Nòtas e referéncias[modificar | modificar la font]

  1. Aqueu canon illustra lei mejans febles donats au projècte car èra una pèça d'artilhariá de captura d'origina britanica utilizada per l'armada bèlga.

.