Wilhelm von Leeb
Wilhelm von Leeb (5 de setembre de 1876, Landsberg am Lech - 29 d'abriu de 1956, Füssen) es un manescau alemand de la premiera mitat dau sègle XX.
Fiu d'un oficier de l'armada bavaresa, Wilhelm von Leeb s'engatjèt dins l'armada alemanda en 1895. Participèt ansin coma oficier a la repression de la Revòuta dei Boxers (1899-1901) e a la Premiera Guèrra Mondiala (1914-1918). Après 1918, von Leeb demorèt dins l'armada e foguèt nomat generau en 1930. Catolic conservator, èra pauc favorable au nazisme mai Adolf Hitler li donèt de responsabilitats pus importantas gràcias a seis estats de servici exemplars. Participèt ansin a l'ocupacion de Checoslovaquia coma cap d'armada (1938) e a la campanha de Polonha coma cap d'un grop d'armadas (1939).
Opausat a una ataca còntra França, von Leeb foguèt pasmens encargat, tornarmai a la tèsta d'un grop d'armadas, de rompre lei defensas de la Linha Maginot en mai de 1940. Aqueu succès li permetèt de venir manescau. Puei, en 1941, comandèt l'avançada dau grop d'armadas Nòrd de la Wehrmacht. Conquistèt lei regions balticas e enceuclèt Leningrad. Dins aquò, de desacòrds l'opausèron a Hitler a prepaus de la conducha deis operacions dins la region. Lo 15 de genier de 1942, von Leeb perdiguèt son comandament e foguèt plaçat dins la resèrva fins a la fin de la guèrra.
Arrestat en 1945 per leis Estatsunidencs, von Leeb foguèt condamnat a tres ans de preson per un tribunau militar estatsunidenc per crime còntra l'Umanitat. D'efiech, durant l'invasion de l'URSS, aviá transmés a sei subordenats leis òrdres destinats a facilitar l'execucion dei judieus, dei comunistas e dei civius sospichats de resisténcia. Pasmens, la pena foguèt limitada car l'acusacion poguèt pas produrre de documents mostrant un ròtle dirècte de von Leeb dins lei chaples realizats per lei SS dins sa zòna de comandament.
Liames intèrnes
[modificar | Modificar lo còdi]Bibliografia
[modificar | Modificar lo còdi]- (en) Valerie Hebert, Hitler's Generals on Trial: The Last War Crimes Tribunal at Nuremberg, University Press of Kansas, 2010.
- (en) Geoffrey P. Megargee, Inside Hitler's High Command, University Press of Kansas, 2000.