Wikipèdia:AcuèlhLutzSus/26 de febrièr

Ucraïna (en ucraïnian Україна; pron.: [ukrɑˈjinɑ]) es un país e un estat d'Euròpa de l'Èst. Confronta Moldàvia, Romania, Ongria, Eslovaquia e Polonha a l'oèst, Bielorussia au nòrd e Russia a l'èst. Es limitada per la mar Negra e la mar d'Azov au sud. Sa capitala es Kyiv (pr. quiïiu). Lo gentilici es ucraïnian -a (o ucraïnés -esa).

Las originas de la cultura ucrainiana remontan a l'estat medieval de la Rus' de Kyiv. Après la casuda d'aqueste après las invasions mongòlas del sègle XIII, lo territòri faguèt l’objècte de particions e se vejèt revendicat per mai d'una poissenças estrangièras coma la Republica de las Doas Nacions e l'Empèri Otoman. L'Etmanat cosac independant existiguèt entre los sègles XVII e XVIII, abans d’integrar l'Empèri rus.

Pendent la revolucion russa, la Republica populara ucrainiana coneguèt brèvament l'independéncia amb reconneissença internacionala, mas acabèt per venir la republica socialista sovietica d'Ucraïna de l'Union Sovietica, dins las annadas 1920 a la seguida de la guèrra civila russa. Ucraïna venguèt tornarmai independenta en 1991, après la casuda de l'URSS. A la seguida de la revolucion de 2014, Crimèa foguèt anexada per Russia e una guèrra civila espetèt dins l'èst del país, amb los separatistas proruses. Lo 24 de febrièr de 2022, Ucraïna foguèt envasida per las fòrças armadas russas sus òrdre de Vladímir Pótin.