T-64

Fotografia d'un T-64 ucraïnian durant un entraïnament.

Lo carri T-64 es un carri de combat principau sovietic de tresena generacion desvolopat entre 1951 e 1962. Foguèt lo premier carri de tresena generacion e representava, au començament deis ans 1960, una revolucion en matèria de combat blindat amb l'integracion d'equipaments fòrça modèrnes. En particular, dispausava d'un canon especialament concebut per un usatge per un carri de combat. Foguèt tanben lo premier blindat equipat d'un blindatge composit acier/ceramica. Aquò èra un progrès important car aqueu tipe de blindatge ofrís una proteccion renfòrçada còntra lei cargas vuejas.

Lo T-64 èra destinat ai unitats blindadas sovieticas e foguèt jamai exportat. De mai, demorèt fòrça secrèt fins a la fin de la Guèrra Freja en despiech de la produccion de 13 000 exemplaris de 1963 a 1987. Dins aquò, foguèt considerat coma una revirada per mai d'un oficier sovietic en causa de sa complexitat tecnica que limitava fòrça sa disponibilitat. La fisabilitat dau motor en particular foguèt un problema recurrent e jamai totalament reglat. Ansin, se lei generacions seguents de carris sovietics (T-72 e T-80) s'inspirèron dau T-64, la simplificacion foguèt la nòrma per dispausar d'un carri pus fisable. En Occident, la descubèrta dei performàncias dau T-64 entraïnèt lo desvolopament dau Leopard II e dau M1 Abrams qu'equipan totjorn leis armadas de la màger part dei país de l'OTAN.

Au nivèu operacionau, lo T-64 participèt ai conflictes de l'espaci pòst-sovietic. Foguèt ansin utilizat durant lei guèrras de Chechenia. Pasmens, coma mai d'un autre blindat, i foguèt fòrça mau emplegat per l'armada russa e plusors exemplaris foguèron destruchs dins de combats urbans. De mai, après l'afondrament de l'URSS, lei dificultats financieras de Russia empachèron d'entretenir corrèctament un veïcul tant complèx. Lei fòrças blindadas russas decidèron donc de l'abandonar durant leis ans 2000. En revènge, Ucraïna, ont èra installada l'usina de produccion, poguèt contuniar d'o modernizar e de l'utilizar. Ansin, una version novèla, integrant un blindatge reactiu, foguèt desvolopada.

Liames intèrnes

• Carri de combat.
• T-62.
• T-72.
• T-80.

Bibliografia

• (en) Steven J. Zaloga, T-64 and T-80, Concord, 1992.
• (en) Steven J. Zaloga, T-64 Battle Tank : The Cold War’s Most Secret Tank, Osprey Publishing, coll. « New Vanguard », 2015.