Sacha Distel

Lo cantaire francés Sacha Distel en 1965

Alexandre Sacha Distel, dich Sacha Distel, es un guitarrista de jazz, compositor e cantaire francés nascut lo 29 de genièr de 1933 a París (França) e mòrt en Occitània lo 22 de julhet de 2004 al Raiòu Canadèu (Provença).

Biografia

Sacha Distel es d'origina russa per son paire, Lionia (Léonide) nascut a Odessa ; es tanben lo nebot de Ray Ventura per sa maire, Andrée Ventura (1902-1965), d'origina turca e de religion josieva. Gràcias a son oncle Ray Ventura, Sacha Distel s'interèssa progressivament al jazz. Aital, dins las annadas 1950, es guitarrista de jazz a París dins los barris de Saint-Germain-des-Prés e del Quartier Latin, e en 1956, Sacha Distel es ja considerat coma l'un dels melhors guitarristas de jazz francés, e pauc après se lança dins la cançon francesa. Obten aital en 1959 un primièr gròs succès popular ambe lo títol Scoubidou, primièr d'una longa seria dins las annadas 1960 e 1970 ; demest sos tubes mai coneguts en França, se pòt citar Marina (La Belle Vie), Monsieur Cannibale, Scandale dans la famille, L'Incendie à Rio, Toute la pluie tombe sur moi o encara lo plan simbolic Le Soleil de ma vie en duò ambe Brigitte Bardot, vist que foguèt sa galanta pendent dos ans. Obten enfin tanben un darrièr tube memorable en 1980 : Le Bateau blanc.

De 1963 e fins a 1971, en mai de sa carrièra de cantaire, foguèt tanben animator a la television francesa, justament presentator d'emissions de cançons popularas (lo Sacha Show).