Rémi Gaillard
Rémi Gaillard (en occitan : Remèsi Galhard), nascut lo 7 de febrièr de 1975 a Montpelhièr (Occitània), es un umorista francés militant de la causa animala.
Se fa conéisser en publicant de videos risolièras sus YouTube. A per eslogan : « C'est en faisant n'importe quoi qu'on devient n'importe qui » (Es en fasent qué que siá que se ven qual que siá).
A partir de 2015, Rémi Gaillard s'engatja pels dreches dels animals. Participa a mantunas campanhas e accions per d'organizacions coma la Societat protectritz dels animals (SPA), lo PETA o lo L214. En 2020, se presenta quitament coma candidat animalista a las eleccions municipalas de Montpelhièr (Lengadòc).[1]
Ancian jogaire de fotbòl al club del Crèç, es pendent una periòda de caumatge que Remèsi comença de far de videos que pòsta sus internet e que coneisson còp-sec una granda capitada.
Rémi Gaillard realiza sas videos en emplegant lo comic de situacion, en jogant sus son comportament otrancièr : en 2007 tira dins un balon de fotbòl e marca un ponch dins un forgon de polícia ; en 2008 e 2011, paròdia lo videojòc Mario Kart en getant al bel mièg de la circulacion pèls de bananas jos las ròdas dels automobilistas ; en 2010, armat d'una poseta e desguisat en parpalhon, fa mina de capturar un policièr.
Sas videos, ont jòga lo personatge principal, son sovent sens paraulas. Reivindica Buster Keaton coma influéncia.
En 2001, desbarca sus la cort de tenís pendent una partida d'exibicion opausant Yannick Noah a Henri Leconte, e marca quitament un ponch.
En 2002, pendent la finala de la Copa de França, desguisat en fotbolaire de l'equipa d'An Oriant, fa lo torn d'onor ambe los jogaires, sarra la man del president de la Republica francesa Jacques Chirac, que l'auriá quitament lançat « Felicitacions, (as) plan jogat ! ». Puèi s'apodera de la copa e signa d'autografs sens que degun se maine pas de sa colhonada.
La meteissa annada, Remèsi capita de montar sul podium de Mister Univèrs e de pausar ambe los culturistas.
En 2003, a la television francesa, dins l'emission Des chiffres et des lettres, se mescla al public puèi fa mina d'aver trobat la bona responsa a un calcul complicat ; li balhan alavetz un micro e pronóncia un calcul improbable. Pasmens, l'emission essent enregistrada per avança, la sequéncia del marrit-calcul es pas difusada. La meteissa annada, s'introdutz tanben sul platèl de Questions pour un champion e entrapèla lo presentator Julien Lepers.
En 2007, s'introdutz sus una partida de rugbi entre Montpelhièr e Bourgoin-Jallieu ; i marca un ensag e una penalitat abans d'èsser sortit de l'estadi per la securitat.
En abril de 2013, Remèsi entrapèla un còp mai la television francesa, la cadena TF1 pendent l'emission Confessions intimes. Ambe l'ajuda de complicis que se fan passar per un coble a la broa de la rompedura, capita a far difusar un reportatge sus un fals fan d'el que lo fariá passar abans sa pròpia femna.
En 2021, es a l'origina d'una burla suls OVNIS[2] : Dins la nuèch del 9 al 10 de novembre, un fenomèn aerian non identificat es filmat dins mantuns cantons d'Occitània e difusat sus las rets socialas. Lo 13 de novembre, evocant Orson Welles, desvèla que s'agís d'una colhonada que n'es l'autor.[3]
Referéncias[modificar | Modificar lo còdi]
- ↑ https://www.midilibre.fr/2020/01/07/montpellier-pour-les-municipales-remi-gaillard-veut-faire-des-animaux-une-priorite,8646124.php
- ↑ https://www.tf1info.fr/justice-faits-divers/video-un-ovni-a-t-il-traverse-le-ciel-d-occitanie-a-palavas-sete-narbonne-ou-perpignan-ce-mardi-9-novembre-2201668.html
- ↑ https://www.sudouest.fr/societe/video-des-ovnis-apercus-en-occitanie-l-enorme-canular-de-remi-gaillard-6950094.php