Ocupacion d'Alemanha après la Segonda Guèrra Mondiala
L’ocupacion d'Alemanha après la Segonda Guèrra Mondiala es lo resultat de la volontat dei quatre « Grands » d'eliminar lo regim nazi e d'empachar tota resurgéncia dau militarisme alemand. Organizada a partir de 1943, es mesa en òbra après la capitulacion alemanda dau 8 de mai de 1945. L'Estat alemand foguèt dissòut e lo territòri foguèt devesit en quatre zònas d'ocupacion plaçadas sota la direccion de l'URSS, deis Estats Units, dau Reiaume Unit e de França. Son debanament pòu èsser decopats en tres periòdes.
Istòria
[modificar | Modificar lo còdi]De 1945 a 1949, lei Quatre Poissanças aliadas exerciguèron dirèctament l'autoritat suprèma en Alemanha e i aviá plus d'Estat alemand centrau. Aqueu periòde foguèt marcat per d'esfòrç per assaiar de desnazificar lo país. Pasmens, aquela politica foguèt minada per leis urgéncias umanitàrias e economicas liadas a la reconstruccion e ai pagaments deis indemnitats de guèrra. De mai, lei tensions creissentas entre Occidentaus e Sovietics menèron pauc a pauc au començament de la Guèrra Freja. Òr, en causa de sa posicion centrala entre lei dos blòts, Alemanha venguèt rapidament un deis enjòcs majors dau conflicte.
De 1949 a 1956, la rompedura entre l'Oèst e l'Èst menèt a la formacion de dos Estats alemands distints : la Republica Federala d'Alemanha (RFA) a partir dei zònas d'ocupacion estatsunidenca, britanica e francesa e la Republica Democratica Alemanda (RDA) a partir de la zòna sovietica. Vèrs 1954, lei dos Estats èran integrats dins sei blòts respectius. Lor sobeiranetat èra oficialament restaurada mai lei Quatre Poissanças gardèron sei drechs regardant lo reglament definitiu de la guèrra. En particular, Berlin demorèt devesit en quatre zònas.
Après 1956, lo statu quo se mantenguèt mai Alemanha demorèt un enjòc important de la confrontacion entre Estatsunidencs e Sovietics. En particular, en 1961, aguèt luòc la crisi de la construccion de la muralha de Berlin. Puei, dins leis ans 1980, se debanèt aquela de la crisi deis euromissils. Aqueu periòde durèt fins ai dificultats sovieticas de la fin de la Guèrra Freja. En 1990, après l'afondrament de la RDA, lei doas Alemanha foguèron oficialament reünidas e lo Tractat 2+4 organizèt l'evacuacion dei tropas d'ocupacion.