Nebosan

Nebosan qu'es un parçan d'Occitània situat en  Gasconha e mei o mens en Comenge . La soa vila principau qu'es Sent Gaudenç.

Toponimia

Nebosan es atestat jos la forma Neboysan (òc ancian) en 1398. Eth nom de Nebosan que seré benlhèu eth d'un comte [o vescomte] *Nepotianus cargat d'administrar era region. En eras regions pirenencas, eths noms de país que son formats dab un nom de persona seguit d'eth sufixe -anum (implicitament, en aqueth cas particular, eth sufixe qu'ei dejà contengut en eth nom de persona): Tursan, Marsan (parçan), Gavardan, Lavedan; mei au nòrd, qu'ei eth sufixe -acum (F. Lot qu'escriu -iacum) : Fesençac (de Fidentius), Pardiac (de Pardus), Astarac (d'Asterius), Armanhac (d'Arminius) .

Istòria

Ferdinand Lot qu'associa mei o mens Neurest (eth país deths onobrisates) e Nebosan : « (Ciutat) qu'ei incontestablament eth caplòc deth Nebosan » (mès eths limits deras circonscripcions feudalas non coïncideishen exactament dab eths limits de pòbles antics).

Politicament, Nebosan, ahonit dens Comenge, qu'i estó incorporat cap ara fin deth sègle XII. Ath sègle XII, qu'èra demorat autonòm. En un bornatge deth comtat de Bigòrra, qui data, çò sembla, de 1283, qu'ei escriut: Lo comtat de Begorra confronto de sol lebante [a l'èst]... ab las peyras fytadas... del bescondats del Nebozan (Ferdinand Lot que senhala eth tèxte en gascon qu'ei ua traduccion posteriora deth originau latin; en 1083, i a pas enqüèra cap tèxte administratiu en gascon).

Era partida occidentau de Nebosan qu'èra religiosament en era diocèsi de Bigòrra. Com eths onobrisates avèn un territòri petitòt, era Glèisa no'u donè cap diocèsi e, religiosament, eth territòri qu'estó aplegat ara diocèsi e civitas de Bigòrra .