Muàwiya Ièr

Un article de Wikipèdia, l'enciclopèdia liura.
Salta a la navegació Salta a la cerca

Muàwiya Ièr, que son nom complèt èra ʾAbū ʿAbd Ar-Raḥmān Muʿāwiya ibn ʾAbī Sufyān, (602, La Mèca - 6 de mai de 680, Damasc) foguèt lo fondator dau Califat Omeia e son premier califa de 661 a 680. Son fiu Yazid Ièr (680-683) li succediguèt après sa mòrt. Adversari d'Ali ibn Abi-Talib e d'Al-Hussayn ibn Ali, a un imatge fòrça negativa au sen de l'islam chiista.

Èra lo fiu d'Abu Sufyan ibn Harb que foguèt un adversari acarnat dei premierei comunautats musulmanas fins a sa conversion l'islam en 630 ambé la presa de La Mèca per Maomet. Abu Sufyan ibn Harb demorèt fidèus au Profèta e a sei successors dins lo corrent deis annadas seguentas. Muàwiya venguèt alora escriba de Maomet e participèt ai premierei campanhas dei conquistas aràbias. Lo califa Othman ibn Affan (644-656) lo nomèt governador de Siria.

Après l'assassinat d'Othman, Muàwiya intrèt en conflicte amb Ali ibn Abi-Talib, cosin de Maomet, a prepaus de la succession e de l'orientacion a donar a l'islam. En particular, Ali èra opausat a l'institucionalizacion de l'islam e a la transformacion dau califa en sobeiran temporau. Èra tanben en favor de l'idèa qu'un califa poguèsse èsser chausit per lei musulmans en fòra dau pòble arabi e dei tribüs de La Mèca. Au contrari, Muàwiya — que fasiá partida dau meme clan qu'Othman — defendiguèt la legitimitat deis abitants de La Mèca e foguèt sostengut per una partida importanta de l'aristocracia aràbia. En 657, lei dos pretendents reüniguèron sei tropas avans d'acceptar finalament un arbitratge. Aquò afebliguèt la posicion d'Ali que foguèt assassinat quatre pus tard per un kharijista laissant lo poder a son rivau.

Muàwiya prenguèt alora lo títol de califa e installèt sa capitala a Damasc. Capitèt de contraròtlar lei vilas importantas dau Califat mai lei zònas ruralas, especialament en Mesopotamia demorèron lòngtemps ostilas. Aquò li permetèt de perseguir l'expansion territòriala aràbia en Mediterranèa e en direccion d'Asia Centrala. En 680, deguèt faciar una revòuta menada per Al-Hussayn ibn Ali, fiu d'Ali, que foguèt batut a executat a Kerbala (680).

Muàwiya moriguèt dins son palais lo 6 de mai de 681 e son fiu Yazid li succediguèt. Aquò èra una evolucion importanta car, per lo premier còp, lo califa venguèt una foncion ereditària.

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]