Mayhem

Un article de Wikipèdia, l'enciclopèdia liura.
Sauter à la navigation Sauter à la recherche

Mayhem qu'ei un grop norvegian de black metal. Qu'ei un deus grops fondators d'aqueth estil. Qu'an causit l'anglés per lenga d'expression artistica.

Biografia[modificar | modificar la font]

Las originas[modificar | modificar la font]

Lo grop que's formè en 1983. Los purmèrs membres que n'estón Destructor (aliàs Øystein Aarseth, guitarrista, qui's harà mei tard aperar Euronymous), Messiah (aliàs Eirik Nordheim, cantaire), Necrobutcher (aliàs Jørn Stubberud, baishista) et Manheim (aliàs Kjetil Manheim, trucaire). Qu'ei dab aquera formacion qui enregistraràn las loas duas purmèras maquetas, puish que sortiràn lo lor purmèr disc vertadèr : Deathcrush, dab lo cantaire Maniac(Sven Erik Kristiansen), qui remplacè Messiah. Lo tiratge d'aqueth disc qu'èra limitat a 1000 exemplars mes que's venón pro viste. La musica qui perpausava qu'èra ua mena d'ultra-speed metal (au sens on volèn jogar enqüèra hòrt mei viste que los grops de speed metal), influenciat per Venom e Bathory mes tanben peus purmèrs grops de death metal, hòrt marginaus a l'epòca. En 1988, Manheim e Maniac que se'n van deu grop : lo purmèr que s'a trobat un tribalh vertadèr e lo segond qu'ei internat dens un espitau psiquiatric per'mor d'aver hèit ua temptativa de suicidi. Que son remplaçats per Dead (Per Yngve Ohlin) au micrò e Hellhammer (Jan Axel Blomberg) a la bateria. Qu'ei dab aquera formacion qui haràn lo "live in Leipzig" e lo live piratat "Dawn of the black hearts". Mes en abriu de 1991, Dead que's suicida. Abans d'aperar la polícia, Euronymous, qui trobè lo còs, que'n prenó fòtos. Ua d'aqueras fòtos que's retrobarà sus la pocheta deu disc pirata "Dawn of the black hearts".

Pauc après, Euronymous e Hellhammer qu'enregistrèn un album qui influencè hèra de grops : "De misteriis dom Satanas" ("Los rites secrets deu senhor Satan"), considerat per mei d'un com lo lor cap d'òbra. Sus la pocheta de l'album, que vedem sonque aqueths dus musicians mes la guitarra baisha qu'estó enregistrada per Count Grischnack (Varg Vikernes, unic membre de Burzum)e la votz per Attila Csihar (cantaire ongrés, membre deu grop Tormentor). En 1993, abans que sortisse l'album, Vikernes que tuè Øystein Aarseth per rasons de las escuras. "De Misteriis" qu'estó donc un disc postum d'Euronymous. Per quauques fans deu grop, Oystein Aarseth que n'èra l'auna. Dab la soa mort, Mayhem que's moriva tanben. La familha d'Aarseth que demandè aus membres deu grop qui demoravan de boishar las partidas de baisha enregistradas per Varg Vikernes mes arrés ne'us responón pas.

Après Euronymous[modificar | modificar la font]

Quauquas annadas apuish, Mayhem que's tornè formar dab Necrobutcher a la guitarra baisha, Hellhammer a la bateria, Maniac aus vocaus e un navèth membre, Blasphemer (Rune Erickson) a la guitarra. Quauques fans de la purmèra òra que digón qu'aquèra arre-formacion avè per but de profieitar de la celebritat qu'Euronymous e Dead avèn autrejada au grop e au black metal per las loas morts violentas e peus incendis de glèisas qui avèn hèits (un reportatge qu'estó realizat per la television norvegiana sus aqueste subjecte) entà ganhar moneda aisidament. Los membres actuaus deu grop n'ac denègan pas mes en hant ua musica black metal dab conviccion que s'an sabut ganhar l'estima d'un public navèth.

La "legenda" de Mayhem[modificar | modificar la font]

Après la mort d'Euronymous, Mayhem qu'avó ua celebritat hòrta e immmediata. Cò qui hè que los fans de black metal, qui aiman lo sensacionau morbide, que parlèn e desparlèn hèra suus membres defunts deu grop. Quin destrejar, ara, la vertat de çò d'exagerat o de completament faus?

Dead[modificar | modificar la font]

Capvariat e obsedat per la mort, qu'auré avut, a un moment dat, un corbaish mort dens lo son sac e que l'agradava de'n sentir l'aulor. Que's pareish tanben que li apariva d'enterrar la soa harda pendent mes dens un cemitèri, abans los concèrts, entà qu'ajan l'aulor deu poeirumi. Qu'èra esquisofrène. Las balas qui'u servín a tuà's que serén un present d'aniversari qui li auré hèit Varg Vikernes (los dus qu'èran caçaires). Vikernes que seré donc responsable de la mort de dus membres de Mayhem.

Euronymous[modificar | modificar la font]

Cò d'a puish près segur qu'ei qu'estó eth qui prenó las fòtos de Dead après lo son suicidi (los dus òmis que vivèn amassa e qu'estó eth qui aperè la polícia).Cò de segur, tanben qu'ei que hasó partida de l'Inner Circle, los gavidaires de l'organizacion terrorista qui bruslè mantuas glèisas de husta en Norvègia e qui miacè de mort mantuns musicians de metal qui ne partatjavan pas las loas conviccions anticrestianas o qui las partatjavan mes pas au punt de passar aus actes. Per contra, e cau créder que prenó tròç deu crane de Dead entà ne har un collièr? O mantuns collièrs dont un qui auherí a Hellhammer? E cau créder que mingè tròç deu cervèth deu mort entà reprodusir un rite deus Vikings? De segur, qu'estó suspectat de l'aver tuat mes l'enquista de la polícia que l'innocentè.

Maniac[modificar | modificar la font]

Omi de scena carismatic, qu'avè per costuma de's nafrar lo pitre sus l'empont dab un cotèth. Mensh morbide que Dead, be hasó ua temptativa de suicidi mes que ditz adara qu'èra ua error de joenessa e qu'ei content que lo son hrair l'avosse sauvat. Segon la wikipedia francesa, qu'ei glossofòbe. Valent a díser qu'a páur de parlar en public. Per'mor d'aquò que s'embriagava tostemps abans de pujar sus l'empont. Dinc au dia on, hart penut, e seré estat incapable de's brembar de las paraulas. Blasphemer que l'auré tirat de l'empont de fòrça e remerciat deu grop. Despuish ençà, qu'an tornat préner Attila Csihar, un vocalista ongrés qui avè dejà cridat dens Mayhem mes qui n'apareish pas que suu live Mediolanum Capta Est.

Discografia[modificar | modificar la font]

Pure Fucking Armageddon (1986, demo)

Voice of a Tortured Skull (1986, demo)

Deathcrush (1986, EP)

Live in Leipzig (enregistrat en 1990, sortit en 1992)

De Mysteriis Dom Sathanas (1994)

Wolf's Lair Abyss (1997)

Ancient Skin (1997)

Mediolanum Capta Est (1999)

Grand Declaration Of War (2000)

US Legions (2001)

Live In Marseille(2001)

Chimera (2004)

Commons-logo.svg

Wikimedia Commons prepausa de documents multimèdia liures sus Mayhem.