Marcèu Amont

Marcel Amont

Marcèu Amont (en francés : Marcel Amont) qu'ei lo nom d'empont deu cantaire e actor bearnés Marcèu Miramont (Bordèu, lo 1èr d'abriu de 1929 - Saint-Cloud, lo 8 de març de 2023). Que conegó ua fama de las granas en França dens las annadas 50 e 60. Los sons pairs que deishèn la dura vita aspesa entà anar tà Bordèu on lo pair entrè dens los camins de hèr e la mair dens l'espitau. Joen, que he lo musician (bateria e saxofòn) e l'actor au Conservatòri d'Arts Dramaticas. En 1951 que se n'anè entà París on viscó quauques annadas professionaument mauaisidas dinc a la soa entrada, en 1953, dens la tropa de Jean Nohain on conegó lo succès com actor e la soa escaduda com cantaire dens lo Music Hall parisenc a partir de 1954 mercés a la quau Bruno Cocatrix e'u he cantar a l'Olympia dens l'espectacle d'Édith Piaf.

Au ras de la soa grana carrièra artistica en francés, qu'enregistrè regularament disques en bearnés. Lo son darrèr qu'ei ua mesa en musica de tèxtes famós de, enter autes : Jacòb de Gassion, Alèxi Peiret, Xavièr Navarròt, Filadèlfa de Gerda, Simin Palay e Rogèr Lapassada. Qu'a escrivut libes sus la gasconicitat e la musica bearnesa.

En octobre de 2021, que pareish lo son prumèr roman a las edicions Cairn, Adieu la belle Marguerite («Adiu, bèra Margalida»).

Discografia bearnesa

• 1962: Chanson de la vallée d'Aspe du Béarn et des Pyrénées.
• 1979: Que canto en biarnés.
• 1981: Que conta en bearnés
• 1981: La hesta.
• 1987: Marcèu Amont canta los poètas gascons.
• 1997: Marcèu Amont canta los poètas gascons (en disc compacte).