M2 Bradley
Lo M2 Bradley IFV es un veïcul de combat d'infantariá desvolopat per leis Estats Units d'America dins lo corrent deis annadas 1970 e intrat en servici en 1981. Foguèt tanben adoptat per l'Arabia Saudita. Destinada a l'acompanhament dei carris M1 Abrams, es adaptat ai missions de reconeissença e ais operacions demandant una manobrabilitat importanta. Permet lo transpòrt de l'infantariá sus lo prat batalhier, de'n assegurar la proteccion còntra leis armas leugieras gràcias a son blindatge e de la sostenir gràcias a un canon de 25 mm e de míssils TOW. Dempuei 1981, mai de 4 600 son estadas produchas.
Lo M2 Bradley participèt ai doas guèrras estatsunidencas còntra Iraq. A demostrat son eficacitat sus lo prat batalhier e sa capacitat de destrurre de carris T-55 ò T-72 iraquians[1]. En revènge, son blindatge es aparegut tròp feble per arrestar lei tirs d'armas anticarris utilizadas per lei guerilhas iraquianas après l'afondrament dau regime de Saddam Hussein.