KV-1

Lo KV-1 es un carri pesuc sovietic concebut en respònsa ai caréncias de l'arma blindada de l'Armada Roja durant la Guèrra d'Ivèrn. La produccion durèt de març de 1940 a aost de 1942 per un totau de 2 769 exemplaris. A son intrada en servici, lo KV-1 presentava de caracteristicas encara raras dins lo mond amb un canon de 76,2 mm, un blindatge de 75 mm e una velocitat de 16 km/h sus lo prat batalhier^[1]. Pasmens, aquò aguèt per consequéncia una massa de 43 t que passèt a 47,5 t sus lei versions pus blindadas imaginadas après lo començament de la Guèrra Germanosovietica^[2].

Lo KV-1 laissa donc un sovenir mitigat dins l'Armada Roja. Sa poissança de fuòc e son blindatge espés foguèron d'atots majors durant l'invasion alemanda de l'URSS car la Wehrmacht aviá pas de carris capables de destrurre un KV-1 ai distàncias normalas dau combat, a l'excepcion dei StuG III equipat d'un canon lòng. Leis Alemands foguèron donc sovent obligats d'esperar l'arribada de canons de 88 mm per combatre leis unitats dotadas de KV-1. Pasmens, la concepcion accelerada dau carri èra la causa de panas frequentas, especialament au nivèu de la transmission qu'èra pas adaptada a la massa dau carri. Fòrça KV-1 foguèron donc abandonats per seis equipatges e l'Armada Roja aprofichèt rapidament l'intrada en servici de modèls pus fisables per arrestar la produccion. Dins aquò, lo KV-1 foguèt utilizat fins a la fin de la guèrra, compres per l'armada alemanda qu'aviá capturat de desenaus d'exemplaris en 1941.