ITER

Un article de Wikipèdia, l'enciclopèdia liura.
Anar a : navigacion, Recercar

ITER (reatour esperimentau de fusioun termonucleàri, o en anglès "International Thermonuclear Experimental Reactor") es un proujèt de reatour de recerco de tipe tokamak que sa toco es de moustra la possibleta d'esplecha la fusioun nucleàri pèr la prouducioun industrialo d'energìo.

ITER, qu'es lou fru de la coulabouratioun de sèt sòci (o mèmbre) representent trento-cinq pays, es en coustrutioun à Cadaracho, en Prouvènço. Li sèt mèmbre soun Chino, Euratom (l'Unioun Euroupènco emai Souisso), Indo, Japoun, Courèio dóu Sud, Russío, e lis Estats-Uni.

Lou reatour ITER emplego un councèt de confinamènt magneti nouma « tokamak » que counsisto à embarra lou plasma (un gas iounisa) dins uno gabiolo magnetico en formo d’annèu, dins uno chambro à vueje. S’emplego pèr bruladou un mesclun de deuterion e de trition (d’isotopo d’idrougène) caufa à uno temperaturo de 150 000 000°C (qu’es dès cop la temperaturo dóu centre dóu soulèu) pèr fin d’óuteni li coundicioun necite à la reacioun de fusioun. D’effet, aquelo reacioun de fusioun termonucleàri, ounte dous pichots atome se jounion en un mai gros coungrèio forço mai energìo (14 MeV pèr la reacioun deuterion-trition) que la divisioun d’un gros atome d’uranion en dous mai pichot (fissioun nucleàri). D’un autre las pèr fusiouna dous anioun (ioun carga pousitivamènt) fau apoundre forço energìo initialo pèr vincre sa repoussino eleitrostatico. Acò es un di desfi maje d’ITER de proudurre mai d’energìo que n’en counsoumo.