Gas de sintesi
Lo gas de sintesi, egalament dich singas, gas manufacturat o gas de vila, es una mescla gasosa combustibla producha per pirolisi. Es un gas paure, toxic, acid e corrosiu quand es pas correctament espurat. Es eissit d'una reaccion chimica complexa basaa sus la pirolisi d'una materia organica (fusta, charbon de peira, etc.) en preséncia d'un agent oxidant introduch en quantitat insufisenta. Lo resultat es un gas compausat d'aiga, d'idrogèn, de metan, de monoxide de carbòni e de dioxide de carbòni.
Aparegut durant lo segle XVIII, aqueu gas foguèt fòrça utilizat fins als ans 1960-1970 per produrre de gas destinat a las abitacions, a l'esclairatge public e a l'industria. Totun, en despiech de melhoraments regulars, sa fabricacion dins las usinas de gas èra una importanta fònt de pollucion atmosferica. De mai, los procediments de produccion èran dangeirós e los accidents èran greus. La natura corrosiva dau gas èra pereu un problema per l'entreten dei malhums de distribucion. Encuei, l'utilizacion dau gas de sintesi es normalament limitaa a de reaccions industrialas ont sa preséncia es indispensabla o sa formacion (procediment Haber, procediment Fischer-Tropsch, etc.).