Empèdocles (volcan)
Empèdocles es un volcan sosmarin situat dins lo Canau de Sicília entre Sicília e Pantelleria. Es famós per formar regularament una illa, Ferdinandea, que disparéis rapidament en causa de l'erosion. Sa cima se situa a -8 m de prefondor.
Empèdocles fa partida dei Camps Flegrèus de la Mar de Sicília., un ensemble de 13 volcans sosmarins situats au sud de l'illa. Es un important edifici volcanic de 25 km de largor e de 30 km de longor[1]. En revènge, son autor es febla (aperaquí 200 m) e sa proximitat amb la superficia s'explica subretot per la prefondor febla de la Mar Mediterranèa a aquel endrech. Aquò explica tanben l'emergéncia regulara de sa cima. Aqueu fenomèn foguèt observat tres còps durant lo periòde mai l'illa foguèt sistematicament destrucha per l'erosion.
L'istòria eruptiva d'Empèdocles es mau coneguda car la deteccion deis erupcions sosmarinas es pas totjorn simpla e lo volcan sembla pas aver una activitat comparabla a aquela dei volcans famós de la region coma Ètna ò Estrombòli. De mai, son estructura foguèt solament descubèrta en 2006, çò qu'es relativament recent e qu'illustra lei dificultats per estudiar aqueu tipe de volcans[1]. Quatre erupcions li son atribuïdas en 1632, en 1701, en 1831 e en 1863. Una cinquena erupcion aguèt benlèu luòc en 1911. Uei, l'activitat se limita a l'emission de fumarolas.