Cauna de Lombrives

Un article de Wikipèdia, l'enciclopèdia liura.
Anar a : navigacion, Recercar
LombrivesEntree.jpg

La cauna de Lombrives es la pus granda d'Euròpa. Se dobrís dins la val nauta d'Arièja, a Ornolac e Ussat, al sud de Tarascon d'Arièja, en Lengadòc, dins lo País de Fois e lo departament d'Arièja.

Caracteristicas fisicas[modificar | modificar la font]

L'aiga d'Arièja i a format un sistèma carstic de 39 km amb 7 nivèls subrepausats. Globalament, aquel sistèma se desvolopa dels dos costats d'Arièja entre lo vilatge de las Cabanas ont se situa lo dren pus al sud (nivèl 7) e Tarascon d'Arièja ont se situa l'exsurgéncia de las aigas (cauna de Savart). La cauna de Niaus constituís un dren que ven de la val de Vic de Sòs.

Aquel extraordinari sistèma carstic se compausa quasiment de 200 entradas. Mantuna sala a un volum immens. La « Sala de la Catedrala », a 250 m de l'entrada es coma Nòstra Dòna de París; la « Sala de l'Empèri de Satan », situada a 4 km de l'entrada, es 3 a 4 còps pus granda. Ofrís de concrecions nombrosas, de minerals rars, de variats païsatges sosterranhs e un ric passat preïstoric e istoric.

Lo tipe de ròc es calcari e la temperatura a l'interior es de 13 °C.

Istòria[modificar | modificar la font]

Ossaments de l'Edat del Bronze

Al cors dels sègles a abrigat l'òme preïstoric neolitic, de brigands, d'ermitas, de leproses, de simples pastres, de falses monedaires... Auriá servit de refugi a l'evesque catar Amièl Aicard après la casuda del Castèl de Montsegur en 1244. Abriguèt de prèires e de nòbles durant la Revolucion Francesa, puèi republicans durant lo Primièr Empèri. L'inscripcion pus anciana (vèrs 1578) menciona Enric IV alavetz rei de Navarra, sens que aquò atèste una visita del monarca.