Cataglyphis cursor
Cataglyphis cursor (Fonscolombes, 1846) es una espècia de formiga mediterranèa dau genre Cataglyphis.
Es una formiga mejana (4-7 mm) que presenta un polimorfisme continü de talha. Leis obrieras son de color negra ò bruna sorna quasi unifòrma amb una tèsta e un torax lusents. Leis antenas e lei femurs son pus clars e lei tibiàs son sovent rogencs. Lo formiguier es expausat au Soleu e installat dins de terrens formats d'argiela ò de cauquier. Pòu tenir quauquei milièrs d'individús.
Cataglyphis cursor es una espècia fòrça adaptada ai regions aridas e caudas. Son regime alimentar es omnivòre ambé de preferéncias per lei cadabres d'animaus e per lei solucions sucradas (nectar, melat...). Leis obrieras son activas durant lei periòdes pus cauds de la jornada e recercan d'aliments d'un biais individuau car pòdon pas utilizar de feromònas de pista que serián rapidament dispersadas en causa de la temperatura auta. En plaça, utilizan de marcas visualas, especialament la posicion dau Soleu per s'orientar. Se desplaçan generalament amb una velocitat importanta qu'es caracteristica.
Aquela espècia es presenta en Occitània dins la zòna de l'olivièr, subretot a l'èst de Ròse. Se pòu tanben trobar dins tot lo bacin mediterranèu e dins lei regions de Danubi.
Liames intèrnes[modificar | Modificar lo còdi]
- Lista dei formigas d'Occitània.
- Cataglyphis piliscapus, autra espècia d'Occitània qu'es similara.