Carri Fiat M11/39

Lo carri Fiat M11/39 es un carri mejan italian intrat en servici en 1939, au començament de la Segonda Guèrra Mondiala. Èra inspirat per lo Vickers 6-Ton e concebut per tenir lo ròtle de carri de rompedura. Pasmens, sei caracteristicas li permetián pas d'assegurar aquela mission^[1]. D'efiech, èra armat d'un canon de 37 mm, installat au nivèu dau quadre, e doas mitralhièras de 8 mm. L'idèa èra d'utilizar lo canon còntra leis objectius « durs » e lei mitralhièras per tractar lo rèsta. Dins aquò, aquela concepcion èra pauc eficaça e la poissança deis obús de 37 mm èra insufisenta. Lo blindatge èra egalament tròp feble (6 a 30 mm) e la fisabilitat mecanica èra pas bòna. Enfin, se la preséncia d'una radiò èra prevista dins lei plans de fabricacion, son installacion aguèt pas luòc. Aquelei limits èran ja visibles a l'intrada en servici dau veïcul e la produccion foguèt limitada a un centenau d'exemplaris.

Lo M11/39 participèt ai combats de 1940-1941 en Africa. Son canon de 37 mm obtenguèt de resultats positius còntra lei carris leugiers britanics. En revènge, èra inferior ai carris pus pesucs coma lei Matilda e lei Cruiser. Plusors exemplaris foguèron capturats e utilizats per leis Aliats. La quasi totalitat dei M11/39 construchs sembla d'èsser destrucha a la fin de 1941.