Cantal (montanha)

Vista panoramica dempuèi lo replanat de Sant Sarnin

Lo Cantal o Cantau o Chantal o Chantau, nommat tanben los monts de Cantal, z-es un massís volcanic d'Auvèrnha e forman un parçan d'Occitània. Son punt culminant z-es a 1858 mètres, z-es lo Plom dau Cantal. Coma l'ensemble dau Massís Central, lo Cantal z-es marcat per l'erosion.

Sa vila principala es Riòm de las Montanhas.

Lo Cantal es bordat de plans dau tipe planesas.

Aqueste massís a balhat son nom au departament dau Cantal.

Geografia

Situation

Los monts de Cantal, una de las cinc regions naturalas compausant lo parc natural regional daus volcans d'Auvèrnhe, ocupan d'un biais central la pus granda part dau departement dau Cantal, dins la region Auvèrnhe, au centre dau Massís Central.

Confrontan los parçans seguents :

• Aubrac au sud-èst ;
• la Planesa de Sant Flor a l'èst ;
• Sejalèir au nòrd-èst ;
• Artensa au nòrd ;
• Mauriagués a l'oèst ;
• lo Castanhau au sud-oèst.

Geomorfologia

Z-es l'estratovolcan pus estendut d'Euròpa, de forma a pauc près circulària per un diamètre de 50 à 70 km, que culmina dins sa part centrala au Plom dau Cantal a 1 855 m. Foguèt considerablament modelat per l'erosion daus ancians glacièrs (vau en U, linhas de crèstas descopadas). De manièra gaireben geometrica, un vintenat de vaus s'estiran coma de rais vèrs la periferia, entrecopant los plans basaltics (o planesas) en forma de triangles, territòris pastoraus de tria.

Topografia

Principalas cimas

Los monts dau Cantal se compausan de mai d'una cimas, que las pus conegudas son :

• lo puèi Marin (1 787 m);
• lo Plom dau Cantal (1 855 m), punt culminant dau departament potencialament accessible dempuèi Super Lioran en teleferic ;
• lo puèi Grion, naut de 1 690 m, dòma de fonolita ;
• lo puèi Chavaròcha, naut de 1 739 m, situat au sud-oèst dau puèi Marin ;
• lo puèi de Pèira Arsa, que culmina a 1 806 m, amb un magnific panorama sobre las vaus glaciàrias de Santoira e Impradina ;
• lo puèi de Seichosa (1 650 m), amb un panorama sobre lo circ glaciari de Santoira e la vau d'Alanhon