Baish Ador
Lo Baish Ador (var. non locau Bas Ador) qu'ei un parçan d'Occitània situat en Gasconha 
segon las dadas scientificas de la lingüistica (totun, qu'ei tanben un territòri reïvindicat peus militants basquistas coma part deu Bascoat)[1]. Que's situa dens lo sud-oèst de Gasconha, au hons deu golf de Gasconha, on l'arriu d'Ador e's geta dens lo peugue.
Las soas vilas principaus que son Baiona, Anglet e Biàrritz: que fòrman la conurbacion aperada BAB [ˈbap], (comunautat d'aglomeracion Baiona-Anglet-Biàrritz), qui a 112 026 abitants (2006) e qui aucupa la màger part deu Baish Ador.
Lo Baish Ador que hè part de la província istorica de Labord e deu departament deus Pirenèus Atlantics (region d'Aquitània).
Lengas[modificar | modificar la font]
La lenga tradicionau deu Baish Ador qu'ei l'occitan (gascon), segon las enquèstas filologicas deus sègles XIX e XX (vejatz en particular l'Atlas linguistique de la Gascogne), mes que i a ua hòrta preséncia deu basco deguda a ua immigracion rurau recenta de l'arrèrpaís bascofòne. En tot cap la lenga dominanta qu'i ei lo francés dempuish lo sègle XX. Los movements culturaus locaus que reïvindican l'occitan e lo basco e qu'an obtengut ua senhalizacion trilingua en francés, en basco e en occitan.
Los movements occitanistas que reïvindican lo Baish Ador com ua part d'Occitània, çò que hè en particular l'associacion culturau locau Ací Gasconha. Los movements basquistas que'u reïvindican com ua part deu Bascoat.
Nòtas[modificar | modificar la font]
- ↑ Dens la classificacion deus parçans de Frederic Zégierman, lo Baish Ador qu'ei integrat dens lo parçan deu Bascoat Nòrd.