Amícia de Montfòrt

Amícia de Montfòrt
Nom	(fr) Amicie de Montfort
Biografia
Naissença	sègle XIII
Mòrt	20 de febrièr de 1252 (Gregorian) ; Montargis
Abadessa (ca)
Donadas personalas
Nacionalitat	Francesa
Activitat
Profession	monja (ca) e aristocrata
Autres
Conjunt	Gautier de Joigny (ca)
Descendéncia	Pétronille de Joigny (fr)
Maire	Aliç de Montmorencí
Paire	Simon IV de Montfòrt
Fraires	Simon V de Montfòrt, Amalric VI de Montfòrt e Gui de Montfòrt, Comte de Bigòrra

Amicia o Amícia de Montfòrt^[1] (sègle XIII-1252/3) foguèt una nòbla francesa, filha de Simon IV de Montfòrt e d'Aliç de Montmorencí. Venguèt puèi monja dominicana e fondatritz del convent a Montargí.

Biografia

Se sap pas quasi res sus la naissença e las primièras annadas d'Amicia. Es probablament nascuda al castèl familial de Montfòrt-l'Amaury. En 1209, son paire s'engatja dins la crosada dels albigeses e se pòt supausar que quand Aliç de Montmorencí o ven rejónher l'annada seguenta, sos mainatges l'acompanhavan, Amicia inclusa. Segon d'unas fonts, seriá estada prepausada en maridatge al filh de Pèire d'Aragon^[2], mas lo maridatge a pas jamai agut luòc. L'intencion del matrimòni èra buscar una sortida pacifica a la Crosada albigesa.^{[cal referéncia]} Entre 1223 e febrièr de 1226, esposa Gauchièr de Joinhí (vèrs 1165 † vèrs 1237), senhor de Castèurainard près de la frontièra Gastinés-Senonés.

Monja dominicana

Son paire èra un amic e sosten de Sant Domenge, e Amicia èra ela meteissa plan atirada per l'òrdre qu'aviá fondat^[3]. Après la mòrt de son marit, fondèt un convent a Montargí (entre Orleans e Sens), e demandèt son incorporacion dins l'òrdre dominican, mas encontrèt l'oposicion dels fraires predicaires^[4]. L'8 d'abril de 1245, lo papa Innocenci IV ordenèt l'incorporacion del monastèri de Montargí dins l'òrdre dominican^[5].

Amicia se morís lo 20 de febrièr de 1252 o 1253^[6] a Montargí e es enterrada dins la glèisa del convent^{[cal referéncia]}.

Maridatge e enfants

Amicia e Gauchièr de Joinhí an agut dos enfants:

Peironèla de Joinhí (mòrta en 1289), dama de Sulí e de Chastèurainard, maridada amb Pèire de Cortenai-Champinhèlas-Cònchas - abans mai de 1249, puèi en segondas nòças a Enric II de Sulí (mòrt en 1269)^[6] ;
Gauchièr de Joinhí (abans mai de 1249)^[6], devenguèt monge dominican^{[cal referéncia]}.

Nòtas e referéncias

↑ Segon l'IEO e Lo Congrès permanent de la lenga occitana, i a de variacion intèrna/dialectala entre los prenoms e mots en -ícia, -icia, e -iça--.
Segon aquesta lista de l'Institut d'estudis occitans, la variacion es tre los prenoms en -icia (lengadocian) e en -ícia/-iça (gascon e provençau).
Segon Lo Congrès, es -ícia en 5 dels 6 dialèctes mas -icia en vivaroaupenc. Pel prenom Fabrícia, la varianta Fabriça existís evidament pertot.
Segon las variacions dels noms Alicia-Alícia-Aliça e Felicia-Felícia-Feliça citadas per aquelas listas, la varianta Amiça existís probabla mas es pas atestada.
↑ Flocel Sabaté (12 octobre 2017) The Crown of Aragon (en anglés). Brill. ISBN 978-90-04-34960-5. .
↑ Antonin Danzas (1877) Études sur les temps primitifs de l'Ordre de Saint Dominique. .
↑ JoAnn Kay McNamara (15 septembre 1996) Sisters in Arms. Harvard University Press. ISBN 978-0-674-80984-0. .
↑ Micheline de Fontette (1967) Les Religieuses à l'âge classique du droit canon. J. Vrin. .
↑ ^6,0 ^6,1 et ^6,2 « Comtes de Joigny » sur medlands.