Zòna mòrta
Una zòna mòrta es una zòna ipoxica situaa dins un environament aqüatic (mars, oceans, estuaris, lacs, lònas, etc.). Aquelas zònas pòdon èsser d'origina naturala e son la resulta de massas d'aiga estanhantas au fons d'un bacin, mas despuei la fin dau segle XX, lo nombre de zònas mòrtas es mai e mai importanta en causa de la pollucion o dau chambiament climatic. D'efiech, la formacion de zònas mòrtas es favorizaa per l'aumentacion de la quantitat de nutriments, factor major de la proliferacion d'organismes (algas, medusas, etc.) que consoman lo dioxigene present dins l'aiga. La durada dau fenomene es variabla. Pòt anar de quauques oras a plusors segles. Totun, la disparicion totala dau dioxigene entraïna pas necessariament la disparicion de la vita car los organismes consumators d'oxigene pòdon èsser remplaçats per d'organismes adaptats ai mitans anoxics (cianobacterias, organismes fongics, etc.).