Richard Gotainer

Richard Gotainer es un cantaire, publicitari e de còps quitament actor francés, nascut lo 30 de març de 1948 a París (França). S'a escrich la màger part dels tèxtes de sas cançons, las musicas son plan sovent de Claude Engel o mai recentament de Michaël Lapie.

Richard Gotainer comença sa vida professionala coma publicitària en 1972. D'unas de sas publicitats son vengudas celèbras en França : « Vittel : Buvez, éliminez », « Infinitif » (sul tèma de sa cançon Primitif), « Banga y'a de l'eau », « Tu baguenaudes dans les pâturages, Belle des champs », « Choco BN (Il est 4 heures…) », « On se lève tous pour Danette ! » etc.^[1]

Mai que sas publicitats, son sas cançons que l'an fach conéisser del public francés dins las annadas 80. Cal díser que l'estili de Richard Gotainer es unic : fa de cançonetas synthpop leugèras, quasi infantilas, a l'encòp festivas e en francés, ambe de paraulas risolièras, doncas es plan aluenhat de çò que se fasiá a l'epòca, que s'agisca de la pura synthpop reputada freja e seriosa (« coldwave »), clarament anglofila, o al nivèl dels tèxtes, de la disco-pop ambe sas tematicas epicurianas transgressivas (libertat sexuala, consomacion d'alcoòl e de drògas).

Sas cançons las mai conegudas son Le Youki, Le Sampa (tirat del film Le Maître d'école ambe Coluche, 45 torns vendut a 500 000 exemplars), Le Mambo du décalco, Primitif, Chipie o encara Femmes à lunettes fin 1988.