Renat Lavaud

Un article de Wikipèdia, l'enciclopèdia liura.
Salta a la navegació Salta a la cerca

Renat Lavaud (en francés René Lavaud; Autafòrt, 18 d'abril de 1874 - Sant Rafèu, 6 d'abril de 1955) foguèt un escrivan e filològ occitan de Peiregòrd qu'amb Renat Nelli ajudèt fòrça a la divulgacion dels trobadors.

Biografia[modificar | modificar la font]

Renat Lavaud nasquèt a Autafòrt en 1874, caganís d'una familha que comptava tretze enfants. D'ora Lavaud laissèt son país per preparar d'estudis superiors. Faguèt los estudis al licèu de Peireguers, puèi al Licèu Lakanal ont preparèt sa licéncia e a l’encòp lo concors de l'Escòla Normala Superiora. Foguèt recebut en 1897 e venguèt puèi agregat en letras en 1902. Ensenhèt a divèrses licèus primièr en Occitània (al Puèi de 1900 a 1904), e aprèp demorèt a Laon (Picardia) de 1904 a 1911, abans de passar la Mediterranèa e s'installar en Argeria. Ailà foguèt ensenhaire a Constantina de 1911 a 1913, e puèi a Oran de 1913 a 1919. Tornèt cap a las tèrras d’òc en 1919 e faguèt lo professor a Marselha fins a 1925, abans d’anar en França ont trabalhèt al Licèu Voltaire de París de 1925 a 1926, puèi al Licèu Hoche de Versalhas de 1926 a 1930 e finalament tornarmai a París al Licèu Buffon de 1930 a 1934.

Escriguèt d'articles suls trobadors dins divèrsas revistas coma per exemple Lemosin que i estudièt Bertran de Bòrn (1902) e Gaucèlm Faidit, dins lo Bornat qu'i parlèt de Guiraut de Bornelh o dins las Annales du Midi. Sembla que laissèt un trabalh manuscrich inedit sul trobador Cadenet.

Abans sa mòrt, que l'emportèt en abril de 1955, èra a alestir dos volums suls trobadors amb son companh e amic Renat Nelli.